Daate sjïere gåetiesijjie gohtjesåvva «Jo’Larsa-gåetie» John Larsen (1829-1914) jïh baernie Anders Johnsenen mietie mah gåetiem tseegkigan 1879.
Lissine gåatan gusnie årroejin, lij aaj ålkoegåetie jïh suejnielaaroe gåetien lïhke. Aahtjetjeguaktah daesnie årroejigan 1890 raajan, gosse Dalbakkese juhtigan.
Lohkehtæjjan mietie Joakim Sletthaug ij lij jearsoe naakenidie Jalgesjohka-pruvvien bijjelen båetedh, jïh ij gosse jemhkelde. Sjurhpiedi gosse pruvvien bijjelen veedtsi. Moerevierhkesne maatsi jïh smealladi, joekoen gosse jeatjah vearelde sjïdti. Raeriej mietie såemies båarasåbpoe almetjijstie, skuvlemaanah sinsitniem virtiehtin jïh Aehtjie mijjen lohkin, mearan pruvvien bijjelen vaarrin tjaktjejemhkielisnie. Aaj lijsi vihties viersh saalmegærjeste laavlodh.
Ööhpehtæjja John Olai Elvebakk (1912-1884) soptsesti satne mïrhke gaagkoem råaki Jalgesjohkan jïh Kvigelvan gaskesne jemhkelds daelvieiehkeden. Gaagkoen lij hierkiegaamege gårroehjuelkesne, mij vuesiehti satne lij jïjtjehke bahha.
Jalgesjohka
Jalgesjohka maahta vaarege årrodh daelvege. Aarebi væjroe orreme jïengeste jïh gierkijste mah jïengem Snubba-jaevresne jakseme. Annje stoerre gierkieh desnie dagkerh væjroej minngesne. Jan Elvebakk soptsesti ikth gosse edtji gåetide vaedtsedh skuvleste ovrehte 1960, dellie lovterem govli Jalgesjohkeste. Dïhte Nyheimen vööste skodtedi, jïh jïengeveahkah vööjni mij mahte bæjjese jaksi daan beajjetje pruvvien vööste Jalgesjohkan bijjelen.
Daesnie suejnielaarosne Jalgesjohkan lïhke maanah suejnesne stååkedin. Faahketji almetjh govlin ålkone mah ammes gïelem soptsestin. Dah gïengelåbpoe suejnien sïjse tjïekedin, eevre sjeavohth. Ånnetji mænngan doh ammes gaarvanin. Såemies tæjmoeh mænngan gåetien almetjh gåetide böötin jïh maanah doestin suejneste båetedh. Dah skabroeh soptsestin maam dååjreme. Geerve almetjh vïenhtin doh ammes almetjh lin tjuvrieh mah lin reaverefeelemisnie dajvesne.
