Noerhtesaemien baakoe oainnus lea seamma goh våajnoes, jïh daebpede maahtah stoerre bielieh Snubbeste vuejnedh. Maahta vuejnedh derhviegåetie jïh fievsiegåetie daesnie tjåådtjeme. Jillemes dejstie lea derhviegåetie gusnie årroejin.

Seapan Nils Henrik Andersen (1807-1848) Gullsteineste jïh gåmmebe Berti Henriksdatter Pingi mah diekie orrijin.

Nils jïh Beriten maanah

Nils jïh Berit govhte maanah åadtjoeh, men ajve John Mikal Nilsen (1847-1914) byjjeni.

John Mikal lij ajve tjïjhtjen jaepien båeries gosse tjidtjebe sealadi. Dellie seapan Planterhaugenen gåajkoe juhti gusnie göökte jyönh utni.

Johan Mikal voestegh Sigrid Birgitte Henrikdatterinie (1854-1879) pruvri jïh Sandemarkese juhti. Mænngan pruvri Karen Anna Johnsdatterinie (1857). Paarretjeguaktah Blåfjellet gåajkoe juhtin jïh doh voestes årrojh desnie sjïdtin. 1900-låhkoen aalkoelisnie fuelhkie Vassbakkese juhti Sandemarkesne.

Dïmperdimmieskuvle Oainnusne

Oainnusne Henrik Henriksen (1832-1902) jïh baernebe Olaus Henriksen (1868-1956) dïmperdimmieskuvlem utnin. Dah sijjen learohkh gaajhkem lïerin goh dïmperem sååkesjidh, dïmperestoehkide eebnestidh jïh gåetieh dïmperdidh. Dej gïehtelimmie lij dan stoerre guktie gaajhkh bietsieh Snubbesne njeevhresovvin jïh åtnasovvin bigkemeïebnine.