Feelemelaajroeh
Geajnoebigkeme aareh 1900-låhkoen neavroebarkojne vuajnalgi, jïh maaksoe lij göökte kråvnah biejjege. Geajnoej gaavhtan aelhkebe sjïdti gaskesadteminie voeni gaskemsh. Snubba mij idtji gaskesem jeatjah voenigujmie utnieh aarebi, vïedteldihkie sjïdti kraannavoenigujmie.
Snjaltjen 1.b. 1927 doh voestes bïjlh Snubban gåajkoe böötin. Provresalmetjh Henrik jïh Elen vuajasovvin Evenesen gærhkose, gusnie pruvrigan seamma biejjien.
- Geajnoebarkoe dovne låvlese jïh jallese Attergård-geajnoekroessen luvhtie lij gaervies 1916.
- Geajnoebarkoe Snubban luvhtie Østervik-geajnoekroessen gåajkoe dallah eelki, jïh geajnoe lij såemiesmearan gaervies 1925.
- 1929 Henrik-pruvvie jeanoen bijjelen Jansbakkesne gaervies. Dan nommesadtje lij barkoeåejvie Henrik Øse (1868-1956).
- Geajnoe Bjerkviken gåajkoe illesovvi 1938.
- 1938 Bogen jïh Bjerkvik vïedteldahkesne sjïdti Rïjhkegeajnoste 795.
Heikageajnoe
Heikageajnoen gaavhtan mearoegaertenh jillene ektiedimmiem åadtjoejin Snubbese. Geajnoe Moski-pluevien noerhtebielesne jåhta Tverrelvan gåajkoe, gusnie guhkiebasse jåarhka geajnojne ektine man nomme Attergårdsveien. Øsen luvhtie jïh guhkiebasse låvlese geajnoe gohtjesåvva Petter Hansaveien jallh Vassbotnveien.
Gaertenehistovrije
Moski/Solli
Tjaktjen 2020 dovne gåetie- jïh fievsiesijjieh gååvnesovvin jålladahkesne medtie 100 m daanbeajjetje årromegåetien bijjelen Moskisne. Ij daejrieh gïeh desnie orreme, men sååjhtoe dan lin doh voestes mah Moskisne orrijin, seapan 1700-låhkoen minngiegietjesne. Gåetiesijjie aaj deavesne gååvnesovvi geajnoej gaskesne E10 jïh Snubbageajnoe.
Anders jïh Karen
Anders Johannessen (1796-1847), Grovfjordeste bööti jïh gåmmebe Karen Johanna Henriksdatter (1806-1881) Livangeste, Moskise juhtigan ovrehte 1830. Karenen eejhtegh dah mah luhpiem utnin Livangesne årrodh, mestie Moski lij akte bielie. Anders jïh Karen gaektsie maanah åadtjoejigan; njieljie dejstie pruvrin Vassdalesne, akte juhti Noerhte Kvitforsese, mearan göökte Snubbesne årroejin. Mænngan Anders sealadi 1847 Karen jåerhkieji gaertienisnie årrodh goske jeemi 1881.
Båeries-Elen
Karen jïh Andersen nïejte Elen Susanne Andersdatter (1828-1914) aaj gohtjesovvi «Båeries-Elen» pruvri Henrik Henriksen Panisine (1832-1902) Talmeste, jïh dah orrijin Moskisne. Henrik lij joekoen væjkeles dïmperdæjja. Dah gåetiem tseegkin gaertienisnie 1855, mij mænngan buvrine åtnasovvi. Gåetie annje tjåådtje. Elen jïh Henrik aaj derhviegåetiefievsiem jïh tjeallerem deavan sisnie utnin.
Dïmperegåetie Moskisne
1878 dïmperegåetie Moskisne tseegkesovvi. Lissine fuelhkie desnie årroeji, gåetie aaj skuvline jïh læstadijaanen krirriegåetine åtnasovvi. Gåetiem stueriedi 1932 jïh dåvvoeji 1960.
2. veartenedåaran mænngan daanbeajjetje fievsie tseegkesovvi. Akte vihkeles bielie ïebnijste ræjvome tyskerebraagkijste bööti.
Moski
1890 Anders Henriksen (1854-1936) jïh gåmmebe årromegåetiem dïmperistie bigkin, jïh aaj fievsiem jïh laaroem. Daah gåetieh mænngan Nergården gåajkoe sertiestovvin.
Åestemeprievien mietie skïereden 15. biejjeste 1916 Nergård juakasåvva Moskiste, maam Ole Andersen (1857-1918) eeki, altese göökte aajkoehkidie, Anders Henriksen (1854-1936) jïh Olaus Henriksen (1865-1956). Seamma jaepien Nergård juakasåvva Moskiste. Olaus jåarhka Moskisne årrodh mearan Anders Nergårdem åådtje.
