Vihkeles saemien maanah jïh noerh åadtjoeh jïjtsh gïelem lïeredh, jïjtse gïelesne lïeredh, saemien siebriedahkejieleden, histovrijen jïh aerpievuekiej bïjre lïeredh abpe 13-jaepien skuvletïjjen maadthskuvlesne jïh jåarhkeskuvlesne. Daate saemien maanaj jïh noeri identiteetem nænnoestahta, dej aktem jearsoes viedteldimmiem jïjtsh kultuvresne vadta jïh dah goerkesem åadtjoeh sijjieh leah akte bielie aktede stuerebe ektiedimmeste goh saemieh jïh aalkoealmetjh.

Saemiedigkie sæjhta:

• Saemien perspektijve gorresåvva ööhpehtimmien jïh dotkemen nasjonaale, noerhtelaanti jïh gaskenasjonaale politihkesne.
• Saemien perspektijve gorresåvva maadthlïerehtimmien laakine jih stuvremetjaatseginie.
• Saemieh dam maahtoem, daajroeh jïh tjiehpiesvoeth åadtjoeh mah leah daerpies juktie jieliedisnie bïerkenidh, juktie maehtedh saemien gïelh, saemien siebriedahkh vaarjelidh jïh evtiedidh jïh eadtjohkelaakan meatan årrodh saemien, nasjonaale jïh gaskenasjonaale siebriedahkesne.
• Daaroe hijven daajroeh åadtjoeh saemien kultuvren, siebriedahken jïh histovrijen bïjre.