– Dá ii leat dušše bušeahttapoasta. Lea ovddasvástádus. Mii váldit duođas ahte sámi mánáin, nuorain, vuorasolbmuin ja pasieanttain lea riekti gulahallat iežaset gillii fágaolbmuiguin geat ipmirdit sin vásáhusaid. Stipeandaortnegiid bokte njulgestaga nannejuvvojit olbmuid vuoigatvuođat ja sámegiela boahtteáigi, dadjá sámediggeráđđi Ann-Elise Finbog (SáB). 

Ann-Elise Finbog Árvu/Sámediggi

Vuosttaš háve árvaluvvo ahte stipeandaortnet maiddái fátmmasta:

• Sámi buohccidivššároahpu
• Sámi dulkaoahpu
• Davvisámegiela mastergrádaoahpu

Ortnegis ain vuoruhuvvojit oahpaheaddje- ja giellaoahput, muhto viiddideapmi nanne dearvvašvuođasuorggi, riektedoaimmaid ja almmolaš suorggi sámi giella- ja kulturipmárdusa.

Dá lea konkrehta doaibma vai fuolahit ahte sámegiella duođai hubmojuvvo iešguđet surggiin servodagas. 

– Stipeandaortnegat doibmet konkrehta váikkuhangaskaoapmin ollašuhttit Mánočalbmi-julggaštusa ulbmila guoddevaš servodateallima birra, mii lea heivehuvvon sámi diliide, dadjá sámediggeráđđi Finbog. 

Viiddideapmi čuovvula Duohtavuođa- ja soabadankommišuvnna raportta, ja ovddida oahpu deaŧalaš divvun- ja soabadandoaibman, mii dahká ahte eanebut ožžot vejolašvuođa nannet sámegiela iežaset fágasurggiin. 

Ášši meannuduvvo lávdegoddečoahkkimiin skábmamánu 17.–21. beivviid ja dievasčoahkkimis juovlamánu 1.–5. beivviid. 

Áššeovddidus gávdno dáppe: Sametingets stipend for høyere utdanning - prioriteringer for perioden 2026 - 2029