Sámediggi álggahii nuvttá sámegielat mánáidgárdefálaldaga ortnega jagis 2023, vai eanet sámi mánát oččošedje vejolašvuođa oažžut sámegielat mánáidgárdefálaldaga. Ortnet guoská sámi mánáidgárddiide ja sámi ossodagaide olggobealde stáhtalaš nuvttá mánáidgárdeortnega Davvi-Romssas ja Finnmárkkus.
Dál lea Sámedikki golmmajahkásaš vuoruheami árvvoštallan gárvistuvvon. Árvvoštallama leat čađahan PwC ja Várdu AS Sámedikki ovddas.
Evalueren čájeha ahte ortnet ollislaččat lea relevánta, dárbbašlaš ja dehálaš bargui sámegielain ja sámi kultuvrrain. Váhnemat ja bargit árvvoštallet sámegielat fálaldaga positiivvalaččat, ja sihke iskkadeamit ja jearahallamat čujuhit dasa ahte mánáidgárddit leat šaddan dehálaš arenan sámegillii, identitehtii ja kultuvrii.
Evalueren čájeha ahte olu bargit leat nannen iežaset sámegielgelbbolašvuođa prošeaktaáigodagas. Bagadallan, fágaseminárat ja eanet sámegiela geavaheapmi beaivválaš barggus lea váikkuhan eanet giellafágalaš dihtomielalašvuhtii, oadjebasvuhtii ja systemáhtaleabbo giellabargui.
Evalueren čájeha maiddái ahte mánáin orro buorráneame giellaipmárdus, ja čanastat sámegillii ja sámi kultuvrii lea nannejuvvon. Seammás lea eanet hástaleaddji olahit mihtu ahte sámegiella šaddá mánáid aktiivvalaš ja spontána gulahallangiella, erenoamážit olahit ahte mánáid stoahkangiella gaskaneaset lea sámegiella. Doarvái sámegielat bargit, stáđis giellabirrasat ja guhkesáiggi gielabargu deattuhuvvojit deaŧalaš fáktorin viidáset ovdáneapmái.
Raportta loahpalaš árvvoštallan lea ahte ortnet buktá dehálaš bohtosiid mánáigárdesuorgái sámegiela ja sámi kultuvrra hárrái. Seammás čájeha dat ahte áigumušat gievrras giellamodeallaid ja aktiiva giellageavaheddjiid ektui gáibidit eanet go ruđalaš doaibmabijuid. Doarvái sámegielat bargit, nana giellabirrasat ja guhkesáigásaš giellaovdánahttin orrot leamen mearrideaddjin olahan dihte mihttu produktiiva giellamáhttu ektui sámegielas.
Loga: Rapport om evaluering av gratis samiskspråklig barnehagetilbud (PDF, 606 kB) (čoahkkáigeassu davvisámegillii)