Buoridanmunni sámi oahpponeavvuid ráhkadeamis ja márkanfievrrideamis

Buoridanmunni sámi oahpponeavvuid ráhkadeamis ja márkanfievrrideamis

Sámedikki oahpponeavvoráhkadeami organiseren lea evaluerejuvvon, ja boađus čájeha ahte oahpponeavvuid ráhkadeami ja olámuddui buktima organiseremis, hábmemis ja hálddašeamis lea buoridanmunni.

Vista Analyse lea Sámedikki ovddas evalueren Sámedikki oahpponeavvoráhkadeami doarjjaortnega, ja guorahallan movt oahpponeavvut márkanfievrriduvvojit ja buktojuvvojit oahpaheddjiid olámuddui. Guorahallan guoská áigodahkii 2012-2020 ja evaluerema vuođđun lea dokumeanttaid analyseren ja jearahallamat Sámediggeráđiin, Sámedikki hálddahusain mii hálddaša doarjjaortnega, doarjjavuostáiváldiiguin, oahpponeavvuid geavaheddjiiguin ja gaskkusteddjiiguin.

Loga raportta: VA-rapport 2021-26 Evaluering av Sametingets tilskuddsordning for læremidler (PDF, 2 MB)

Guorahallan čájeha ahte mis leat hástalusat sámi oahpponeavvuid ráhkadeamis, muhto maiddái ahte oahpponeavvoráhkadeami doarjjaortnet lea oalle bures hábmejuvvon ja hálddašuvvon.

– Oainnán hástalusaid mat mis leat, muhto seammás lean hui ilus go evalueren konkludere ahte doarjjaortnega dálá hálddašeapmi lea buorre, ja go evalueren danin ii ávžžut olu rievdadit dán suorggis, dadjá sámediggeráđđi Mikkel Eskil Mikkelsen (NSR).

Váldohástalussan buvttadankapasitehta ja oahpponeavvoráhkadeami ovdáneamis lea go váilot čálli- ja jorgaleaddjiresurssat, ja go doarjjarámma lea ráddjejuvvon. Evalueren ávžžuha álggahit máŋga njulges ja eahpenjulges doaibmabiju oččodan dihte beaktileabbo buvttadeami. Earret eará ávžžuha loktet doarjjamáksomeriid ja rievdadit ohcanáigemeari ja áiggi goas doarjja juolluduvvo, nannen dihte rekrutterema.

Evalueren čájeha ahte mihttomearri ráhkadit sámegiel oahpponeavvuid juohke fágii golmma sámegillii ovtta oahppoplánaáigodagas, ii leat olahuvvon. Jagi 2018 ledje dušše 39 proseanttas fágain davvisámegiel oahpponeavvut mat ollásit dahje belohahkii gokče dárbbuid gustojeaddji oahppoplánaid mielde, ja julev- ja lullisámegiel oahpponeavvuid dáfus ledje logut 19 ja 24 proseantta. Dálá ekonomalaš rámmat čájehit ahte Sámedikkis ii ábut leat nu alla ambišuvdnadássi mihttomearrehábmemis.

Dasto orrot jearahallamat čájeheamen ahte oahpaheaddjit vásihit ahte sis lea fuones oppalašgovva oahpponeavvuin mat juo gávdnojit. Lea dehálaš ahte oahpaheaddjit dihtet oahpponeavvuid birra mat ráhkaduvvojit, ja daid lea dehálaš buktit geavaheddjiid olámuddui. Sámediggi oaidná ahte sámi oahpponeavvuid márkanfievrrideapmái ja olámuddobuktimii gáibiduvvo čielga ja ulbmillaččabu bargu sihke Sámedikki ja lágádusaid bealis.

Guorahallan čujuha ahte lea dárbu oččodit doaibmileabbo doabaráhkadeami, ja buoret ovttastahttima oahpahusa ja oahpponeavvobuvttadeami resurssain mat leat olámuttus.

Buoridanvejolašvuohta lea čielggadit ovddasvástádusjuogu doarjjavuostáiváldi, Sámedikki oahpponeavvoguovddáža ja oahpponeavvouskkádaga Ovttas gaskka. Oahpponeavvuid ferte bures merket, vai daid lea álki ohcat iešguđet oahppocehkiid oahppoplánaid ja gelbbolašvuođamihttomeriid dáfus. Evalueremis boahtá ovdan ahte lea gáibideaddji geavahit oahpponeavvouskkádaga. Dat berre buoriduvvot, vai eanet oahpaheaddjit sáhttet ja háliidit geavahišgoahtit dan.

Sámediggeráđđi Mikkel Eskil Mikkelsen oaidná olgguldas evaluerema ávkki, ja oaivvilda ahte Sámediggi lea ožžon buori máhttovuođu oahpponeavvoráhkadeami ja sámi oahpponeavvuid olámuddobuktima organiserema, hábmema ja hálddašeami buorideapmái.

– Sámediggi áigu lagas gulahallama bokte áššáiguoskevaš ovttasbargobeliiguin ja aktevrraiguin čuovvulit ávžžuhusaid, dadjá Mikkelsen.

Jus leat gažaldagat dahje jus áiggut jearahallat, váldde oktavuođa sámediggeráđiin Mikkel Eskil Mikkelseniin (NSR), +47 917 42 161, mikkel.eskil.mikkelsen@samediggi.no