Medálja lea okta stuorámus ánssuin Norggas, ja addojuvvo olbmuide geat iežaset erenoamáš mávssolaš barggu dihte servodahkii buorrin ánssášit dan.
Allaáiggálaš doalut
Medállja geigejuvvui Bájddáris. Doaluide ledje čoahkkanan báikki olbmot, nationála ásahusaid ja sámediggeráđi ovddasteaddjit. Doppe ledje sáhkavuorut, kultuvrralaš guoimmuheapmi ja guossohuvvui biebmu. Doaluin dovdui ahte olbmot leat rámis ja giitevaččat.
Eallenagi bargan bihtánsámi kultuvrra ovddas
Náittosguimmežat Toril ja Knut Sivertsen leaba viššalit ovddidan bihtánsámi giela, árbevieruid ja historjjá máŋgalogi jagi. Sudno áŋgiruššan lea leamaš mearrideaddji dehálaš vai kultuvra, mii guhká lei dakkár dilis ahte lei jávkame, oainnusmahttojuvvo ja ealáskahttojuvvo.
– Jáhkkemeahttun beaivi
Knut Sivertsen dajai giitossártnistis ahte lea hui giitevaš:
– Giitu buohkaide geat lehpet boahtán ávvudit dán erenoamáš beaivvi. Lean hui ollu jurddašan vássánáiggi, muhto maiddái boahttevuođa birra. Ja mun jurddašan gal ahte mu bajásšaddamis ledje sápmelaččat ja sámi eallin hui guovddážis.
Toril Sivertsen lasihii:
– Ii oro leame duohta ahte moai, áibbas dábálaš olbmot meahccedálus, letne ožžon dán ánssu. Muhto go dan lean dadjan, de háliidan dadjat ahte mun sávan ahte dát lokte sámevuođa ja erenoamážit bihtánsámi kultuvrra. Ollu, ollu giitu buohkaide geat dán leat dahkan vejolažžan munnuide.
Barggu mearkkašupmi bihtánsámi kultuvrii
Politihkalaš ráđđeaddi Anne Henriette Nilut (NSR) deattuhii man mávssolaš náittosbára bargu lea:
– Soai leaba garrasit bargan dan ovddas ahte bihtánsámi kultuvra oidno ja gávdno dán guovllus, ja sudno barggus leat čielga bohtosat. Dat lea buoridan máhtu ja diđolašvuođa bihtánsámi kultuvrra birra, ja ealáskahttán dan Norgga beale Sámis. Soai leaba oainnusmahttán ja gaskkustan dieđuid unnitlogujoavkku birra, mii measta lea vajálduvvan Norggas, dajai son. Sáhkavuorru lea almmuhuvvon Sámedikki neahttasiidui: Tale i forbindelse med overrekkelsen av Kongens Fortjenestemedalje til Toril og Knut Sivertsen - Sametinget
Go ánsomedállja lea geigejuvvon, de almmuhuvvojit dieđut dan birra Gonagaslaš šloahta neahttasiidduide.
