Sámediggi lea dán jagi geassemánus mearridan vuosttaš doaibmaplána daid sápmelaččaid várás geain leat doaibmavariašuvnnat mat eai čuovo norpmaid. Dán barggus čielggai árrat ahte okta váldoulbmiliin dán doaibmaplánas ferte leat kártegoahtit movt sáhttá duohtandahkat daid sápmelaččaid vuoigatvuođaid geain leat doaibmavariašuvnnat mat eai čuovo norpmaid dakko bokte ahte addit sidjiide jiena servodatdigaštallamii.

Elisabeth Erke Árvu/Sametinget

Danne lea okta doaibmabijuin doaibmaplánas ásahit sierra ráđi sápmelaččaid várás geain leat doaibmavariašuvnnat mat eai čuovo norpmaid, mii galgá veahkehit hábmet Sámedikki politihka fágasuorggis. Ráđđi galgá váikkuhit dasa ahte sihkkarastojuvvo viiddis, rabas ja olámuttos mielváikkuheapmi dain áššiin mat gusket sápmelaččaide geain leat doaibmavariašuvnnat mat eai čuovo norpmaid.

Sámediggi lea dál nammadeamen lahtuid dán ráđđái ja háliida áinnas evttohusaid vejolaš lahtuide. Ovddasvástideaddji ráđđelahttu lea Elisabeth Erke.

Áigemearri buktit evttohusa lea juovlamánu 31. beaivi 2024 ja sáddejuvvo deike: samediggi@samediggi.no

Loga Sámedikki doaibmaplána doaibmavádjit sápmelaččaid vuoigatvuođaid ollašuhttimii 2024-2026 (mearriduvvon plána lea siidu 10 rájes)

Loga doaibmaplána dárogillii:

Sametingets handlingsplan for realisering av samiske funksjonshindredes rettigheter 2024-2026 (PDF, 128 kB)