Juolludan ruđa sámi giellaprošeavttaide

Juolludan ruđa sámi giellaprošeavttaide

Sámediggeráđđi lea juolludan 1 627 000 ruvnno davvisámi giellaprošeavttaide, ja 300 000 ruvnno nuortalaš giellaprošeavttaide.

Deaddil ja stuora govva ihtáMikkel Eskil Mikkelsen (NSR) Kenneth Hætta Lea stuora beroštupmi oahppat davvisámegiela, sihke siseatnamis ja riddoguovlluin. Riddoguovlluin leat ožžon doarjaga lágidit sámegielkurssaid ja sámi giellaarenaid ja gielladoaibmabijuid gos galget duddjot ja sámástit.

Vihtta giellaprošeaktaohcamuša mat ožžo doarjaga leat prošeavttat main ulbmil lea applikašuvnnaid ráhkadit. Dat leat sihke báikenamma-, sátnegirje-,  giellaoahppan- ja speallanapplikašuvnnat.

– Applikašuvnnat ja digitála resurssat leat buorit reaiddut giellaovdánahttinbarggus. Danne oaidná Sámediggi dárbbašlažžan juolludit doarjaga dákkár digitála resurssaide, dadjá sámediggeráđđi Mikkel Eskil Mikkelsen (NSR).

NA Technologies AS oažžu 300 000 ruvnno doarjjan ráhkadit ja doaimmahit online-spealu New Amigos nuortalašgillii. New Amigos lea giellaoahpahallanapplikašuvdna. Dál leat unnán olbmot geat hupmet nuortalašgiela. Sámediggeráđi mielas lea dehálaš ahte ráhkaduvvojit digitála spealut mat veahkehit ja movttiidahttet giela oahppama.

– Dákkár online-spealut go New Amigos leat buorit giellaoahppanreaiddut, ja Sámediggi oaidná dehálažžan ahte diekkár giellaoahppanreaidu ráhkaduvvo nuortalašgiela oahppamii, dadjá Mikkelsen.

Lullisámis lea Åarjelsaemien vierhtiesåafoe/Sørsamisk kunnskapspark ožžon 300 000 ruvnno ráhkadit 3D vuođđovuogádaga man heive atnit giellaarenan. Dat lea digitála lávdi mii sáhttá adnot oahpaheapmái, muhto maid gulahallamii ja giellaarenan. Lávddis lea sámegiella ja sámi guovlu/báiki vuođđun. Vuođđovuogádaga sáhttá maid heivehit davvisámegillii. 

Norgga girku áigu dán jagi fas lágidit sámi konfirmánttaleairra, ja leat ožžon 97 000 ruvnno dasa. Sihke lulli-, julev- ja davvisámegiella galgá leairras gullot. Sámi nuorat olles riikkas deaivvadit doppe sámegielasiin, ja leat láhčán dilálašvuođa nu ahte juohkehaš galgá beassat ságastit gillii mii sutnje lea lunddolaš.   

– Mu mielas lea hui somá go ná olu buriide ohcamušaide leat beassan juolludit doarjaga. Movttiidahttá duođaid bargat sámi áššiiguin go álbmogis maid lea ná stuora beroštupmi ovddidit sámegiela, dadjá Mikkelsen.

Jearahallama addá sámediggeráđđi Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no

Dáidda giellaprošeavttaide lea Sámediggi juolludan doarjaga (DOCX, 15 kB)