– Sámediggi bargá dan badjelii ahte sámi mánát ja nuorat galget oažžut buori ja oadjebas árgabeaivvi. Mii leat guhkit áigge oaidnán ahte dárbbašuvvo dakkár doarjjaortnet mii geahpeda givssideami. Sámediggeráđđi háliida láhčit dili nu ahte buot sámi mánáin ja nuorain leat buorit bajásšaddan- ja oahppanbirrasat givssideami, vealaheami ja cielaheami haga mánáidgárddiin, skuvllain, astoáiggearenain ja lagasbirrasiin, dadjá Sámediggeráđđi Mikkel Eskil Mikkelsen (NSR).

Sámediggi mearridii 2024 bušeahtas várret 1 000 000 ruvnno dán ođđa doarjjaortnega ásaheapmái, ja Sámediggeráđđi ávžžuha dál servviid, ásahusaid ja eará aktevrraid ohcat doarjaga.

– Dán ortnega ásaheapmi lea maiddái oassi Sámedikki doaibmaplána čuovvoleamis maid Sámedikki dievasčoahkkin mearridii ovttajienalaččat jagis 2022. Givssideami ja sámevaši vuostálastin gáibida nana áŋgiruššama. Mii doaivut ahte ollugat bohtet ohcat vai mii oaidnit ollu ođđa doaibmabijuid ja prošeavttaid givssideami ja sámevaši vuostá dán jagi, dadjá Sámediggeráđi lahttu Runar Myrnes Balto (NSR).  

Doarjjaortnegis leat čuovvovaš vuoruheamit: 

•    Prošeavttat mat eastadit givssideami, duolbmamiid ja sámevaši.

•    Doaibmabijut mat ovddidit buori psyhkalaš dearvvašvuođa, buoridit loaktima ja huksejit buori bajásšaddanbirrasa sámi mánáide ja nuoraide.

•    Prošeavttat mat loktejit ovdan givssideami ja duolbmamiid.

•    Prošeavttat mat dagahit oassálastima ja ovttasbarggu mánáid ja nuoraid gaskkas.

•    Prošeavttat mat nannejit organisašuvnnaid, joavkkuid ja servviid gelbbolašvuođa barggus eastadit givssideami ja sápmelašvuođa. 

Ohcanáigemearri: 01.11.24

Loga eanet doarjjaortnega birra ja oza dás: Givssideami ja sápmelašvuođa eastadeapmi - Sametinget