Giellaossodagas lea sierra ossodatdirektevra ja das leat guokte juhkosa mas goappásge lea juogushoavda. Ossodagas leat oktiibuot 17 bargi, guđet barget báikenamaiguin, terminologiijain ja gielain.

Sámediggi ohcá dál du, geas lea beroštupmi gillii ja giellaovdáneapmái, ja guhte barggat jorgalanbargguid main lea alla dássi.

Sámedikkis leat máŋga kánturbáikki, ja sáhtát ieš válljet guđe kánturbáikkis háliidat bargat, dainna eavttuin ahte kánturbáikkis leat guoros kantuvrrat.

Don gii virgáibiddjot fertet ráhkkanit dasa ahte lea veahá mátkkošteapmi barggu oktavuođas.

Barggut

Giellaossodat lea juhkkojuvvon guovtti juhkosii main lea ovddasvástádus áššemeannudit sámi báikenammaáššiid, jorgalit dárogiela ja sámegiela gaskka, gielladikšumii, giellateknologiijii ja bargat riikkaidgaskasaš giellaáššiiguin.

Virggi bargosisdoallu lea jorgalit davvisámegiela ja dárogiela gaskka, alit dásis. Jorgalanbarggut sisttisdollet sihke oaneheabbo teavsttaid jorgalemiid, ja maiddái stuorát bargguid, mat gáibidit giellamáhtu ja -gelbbolašvuođa.

Virgái sáhttet maid biddjot eará barggut mat gullet Sámedikki doibmii.

Gelbbolašvuohta

Mii ohcat du, geas lea oahppu allaskuvlla/universitehta dásis, mii vástida bachelor-/mastergráda davvisámegielas. Jus dus lea unnimustá bachelorgráda dahje vástideaddji gráda, ja lea unnimusat vihtta jagi relevánta bargovásáhus, de sáhtát árvvoštallojuvvot virgái. Guhkes bargovásáhus sáhttá buhttet oasi oahppogáibádusas.

Mii ohcat du geas lea guhkes vásáhus jorgalanbargguin. Fertet maiddái máhttit dárogiela, ja áinnas eará skandinávalaš giela.

Dákkár persovnnalaš iešvuođat deattuhuvvojit

• Dáidu bargat iešheanalaččat ja ulbmillaččat
• Buorit gulahallan- ja ovttasbargodáiddut
• Buorre njálmmálaš ja čálalaš ovdanbuktindáidu
• Geabbil ja smáđáhkes

Gelbbolašvuođa árvvoštaladettiin deattuhuvvo oahpahus, bargoduogáš, persovnnalaš heiven ja motivašuvdna virgái.

Mii fállat

Mis lea buorre bargobiras ja ovttasbargat guhtet guimmiideamet sihke iežamet ossodagas ja ossodagaid rastá. Mii rahčat leahkit geabbilat, innovatiiva ja digitálalaččat olahan dihte mihttuideamet. Sámediggi čuovvu stáhtalaš láhka- ja šiehtadusdoaimma.

Mii sáhttit earret eará fállat:

• Buriid loatna- ja ealáhatortnegiid Stáda penšuvdnakássas
• Buohkain geat ásset guovlluin mat ovdal gulle Finnmárkui ja Davvi-Romsii lea vejolašvuohta oažžut oaniduvvot oahppoloana Stáhta loatnakássas 10 proseanttain jahkái gitta 25 000 ru rádjai , sii ožžot maiddái sierra vearrogessosa
• Máškidis bargoáiggi ja eará buriid čálgoortnegiid
• Vahkkosaččat sáhttá hárjehallat diimmu bargoáiggis

• Gelbbolašvuođaloktema sámegielas ja kulturipmárdusas

Bálká- ja bargoeavttut

Virgi bálkáhuvvo Stáhta regulatiivva mielde virgekodas 1434 ráđđeaddi, vuolgá ohcci bargohárjáneamis ja gelbbolašvuođas

Virgáduvvot seniorráđđeaddin 1364, gáibiduvvo dábálaččat masterdási oahppu ja guhkit relevánta bargohárjáneapmi.

• Bálkkás gessojuvvo 2 % Stáhta penšuvdnakássii.

Positiivva sierrameannudeapmi:

• Min mielas lea searvadahttin ja eatnatgeardáivuohta fápmu. Mii háliidit mielbargiid iešguđetlágan gelbbolašvuođain, fágaovttastagain, eallinvásáhusain ja perspektiivvain vai vel buoret nákcet čoavdit bargguid. Mii láhčit dili mielbargiide geat dárbbašit heiveheami. Guoskevaš láhčimat sáhttet ovdamearkka dihte leahkit teknihkalaš veahkeneavvut, viessogálvvuid heiveheapmi dahje bargovugiid earáhuhttin.
• Sámediggi ávžžuha gelbbolaš evttohasaid ohcat, vaikko makkár agis, sohkabealis, našuvnnas dahje čearddalaš duogážis, doaimmashehttejuvvon dahje váilevaš CV.
• Sámediggi lea IA-doaimmahat Čáhkkilis bargodili , dg . Inkluderende Arbeidsliv (IA) , ja deattuha bargodiliid láhčima juohke bargái.

Virgádeapmi dahkko gustovaš lágaid, njuolggadusaid ja šiehtadusaid olis.

Virggis lea 6 mánu geahččalanáigi.

Ohcan

Orru go virgi miellagiddevaš ja háliidatgo ohcat dasa?

Ohcan sáddejuvvo elektruvnnalaččat dás: Oza bargui, ja ohcamuša mielde galget biddjojuvvot:

• Ohcanreive
• CV – oahppu ja bargovásihusat fertejit devdojuvvot elektruvnnalaš skovvái
• Oahppo- ja bargoduođaštusat galget biddjojuvvot mielddusin
• Unnimusat guokte referánssa

Almmolašlága §25 mielde sáhttá almmuhit dieđuid ohcci birra vaikko ohcci lea bivdán ahte ii biddjojuvvo ohcciidlistii.

Oktavuohta

Eanet dieđuid virggi birra oaččut go válddát oktavuođa:

• Ossodatdirektevrain Risten Turi Aleksandersen
  Tel. +47 784 74 009 dahje e-poasta risten.turi.aleksandersen@samediggi.no
• Fágajođiheddjin Risten Länsman
  Tel. +47 784 82 208  dahje e-poasta risten.lansman@samediggi.no

Ovttas nannet Sámi

"Ovttas nannet Sámi" lea Sámedikki bargguid višuvdna bargiide. Sámedikki deháleamos bargu lea ahte Sámedikki politihka ja hálddašeami bokte seailluhit sámi giela, kultuvrra ja servodateallima.

Sámedikki árvvut:

• Sámi vuohki 
• Rabasvuohta 
• Ovttaráđálašvuohta 
• Verddevuohta 
• Oskkáldasvuohta

Sámediggi bargá čuovvovaš mihtuiguin olahan dihte min višuvnna:

• Mis leat gelbbolaš ja áŋgiris mielbargit
• Min váldogiella lea sámegiella
• Min vuoruheamit ja dagut leat birgejumi vuođul
• Mii leat sámi servodatovddideami njunnošis
• Mii leat bivnnuhis bargosadji

Ohcanáigemearri

Skábmamánu 21. b. 2022

Oza bargui