Sámediggeráđđi Berit Marie P. E. Eira (JSL) dadjá ahte dát lea issoras tragediija, sihke elliide mat gillájit diekkár dáhpáhusa geažil ja olbmuide geat gillájit dán stuorra vahága geažil. 

Berit Marie P. E. Eira Árvu/Sámediggi

– Mun sáhtán dušše govahallat man issoras lossat dát ferte leat boazoeaiggádiidda ja olles orohahkii. Boazovahágat eai leat dušše ekonomalaš vahágat. Dát lea stuorra vahágin boazoeaiggádiidda maiddái danne go sis lea sierra oktavuohta buot bohccuideasetguin. Dasa lassin bohtet leat stuorra vahágat jagiid ovddasguvlui, dadjá Eira.

Son čujuha dasa ahte maiddái orohaga mánáin leat heavvanan bohccot, ja dat lea hui váivi sidjiide. 

– Muhtun mánát soitet vuosttaš geardde ožžon bohcco iežaset merkii ja dat lea hui mávssolaš sidjiide. Máŋga orohatmáná leat dál massán bohccuid, ja dat lea hui bávččas. Sámediggeráđi bealis háliidan dovddahit solidaritehta ja oassálastima buohkaide geaidda ášši guoská, dadjá Eira.

Maŋŋel go olu mediat leat čállán ášši birra, de leat ihtán negatiiva kommentárat ja cielaheapmi. Earret eará lea čuoččuhuvvon ahte boazoeaiggádat ieža leat vuojehan ealu jieŋa ala. Dát suorggaha sámediggeráđi Runar Myrnes Balto (NSR).

Runar Myrnes Balto Árvu/Sámediggi

– Dát lea roassu mas boazodoallit eai dušše masse bohccuideaset, muhto das leat fuones váikkuhusat sin eallinvuohkái ja boahtteáigái. Ahte dakkár ášši boktá vaššisága, muitala juoidá das man ollu leat negatiiva miellaguottut ja man jođánat leat dadjat juoidá negatiivvalaččat sápmelaččaid birra. Mun ávžžuhan buohkaid čájehit olmmošlašvuođa dán áššis, ja ahte olmmoš ii cielat ja buvtte dušši sivahallamiid, dadjá Myrnes Balto.

Sámediggeráđđi registrere ahte Kárášjoga gielda fállá heahteveahki dán dilis, ja dadjá ahte lea buorre go dat geaidda ášši guoská ožžot vejolašvuođa hupmat soapmásiin dán heahtedilis.

Maŋimuš jagiid leat máŋgii jápmán bohccot muohtauđđasiid dahje eahpesihkkaris jiekŋa dihte čakčat. Leat máŋga ášši mat sáhttet dagahit muohttaga ja jiekŋagerddiid eahpestabiilan, ja dálkkádatrievdamat leat okta dain. Leat guhkit bievla čakčat ja čáziin ii šatta assás, dássedis jiekŋa nu árrat go ovdal, ja dat sáhttá dagahit ahte čakčajohtin šaddá váddáseabbon. Dat ahte dálkkádatrievdamat dagahit váddáset dili sidjiide geat leat hárjánan dulkot dálkemearkkaid ja lohkat luonddu, lea earret eará duođaštuvvon raporttas "Dálkkádatrievdadeamit Sámis", maid Sámiráđđi lea čállán Sámedikki diŋgojumi vuođul. 

Loga raportta «Dálkkádatrievdadeamit Sámis»