Hamar-gallestallan álggahuvvo duorastaga njukčamánu 23. beaivvi čoahkkimiin Sámedikki ja Innlandet fylkkasuohkana gaskkas, mas fáddán lea ovttasbargošiehtadus mii doaibmagođii 2022 rájes. Čoahkkimis digaštallojuvvo maiddái mo ovttasbargu lea ovdánan dássážii ja mo bealit galget bargat viidáset. Šiehtadusa áŋgiruššansuorggit leat earret eará sámegiella, regionála plánen ja areálahálddašeapmi, oahpahus, kulturovttasbargu, kulturmuitohálddašeapmi, ealáhusovdánahttin ja boazodoallu.
– Lea dehálaš deaivvadit singuin geain mis leat ovttasbargošiehtadusat vai mii nannet sihke ovttasbarggu ja ovttasdoaibmama. Lea hui mávssolaš vuoruhit doaimmaid mat leat buorrin sápmelaččaide geat ásset dán guovllus ja mun illudan deaivvadit fylkkasuohkaniin, dadjá sámediggeráđđi Mikkel Eskil Mikkelsen.
Seamma beaivvi deaivvada sámediggeráđđi máttasámi forumain. Máttasámi foruma ulbmil lea nannet gelbbolašvuođa, hukset oktavuođaid ja nannet Stáhtahálddašeaddji doaimmaid máttasámi giela, kultuvrra, ealáhusa ja dearvvašvuođasurggiin.
Duorastaga eahkeda searvá Mikkelsen sámi kultureahkedii Hamar kulturviesus, gos rahppo johttičájáhus “Hvorfor er du så hjulbeint?”. Čájáhusa fáddá lea árgabeairasisma, ja dan leat ráhkadan Trøndelága Sámi ráđđi, hábmejeaddji Katarina Blind ja Falstadguovddáš. Sámi kultureahket maid čalmmustahttá Mjøsa ja biras sámesearvvi 15-jagi ávvudeami ja sámi artista Kajsa Balto doallá konseartta.
– Illudan sakka albma ávvoeahkedii Hamar kulturviesus, dadjá Mikkelsen.
Bearjadaga njukčamánu 24. beaivvi searvá sámediggeráđđi Mikkel Eskil Mikkelsen seminárii mas fáddán lea vealaheapmi ja árgabeairasisma. Seminára lágiduvvo Fylkkaviesus Hamaris. Semináras besset guldaleaddjit gullat Rita Helmi Toivosdatter Laakso, Lillan Støen, Holger Gustavsen ja Suhur Lorch-Falch vásáhusaid ja muitalusaid vealaheami birra, ovdal go sámediggeráđđi ja Kultur- ja dásseárvodepartemeantta stáhtačálli Gry Haugsbakken oassálastiba ságastallamis mo sáhttá buoridit cealkinkultuvrra.
– Vealaheapmi ja cielaheapmi lea stuorra servodatváttisvuohta, ja dađi bahábut lea dat maid oahpis ollugiidda sámi servodagas. Dat lea áittan demokratiijai ja olles servodat ferte áŋgiruššat ja vuosttildit dan. Danne lean ilus go fylkkasuohkan bidjá fuomášumi dása, dadjá Mikkelsen.
Geahča sámediggeráđi prográmma Hamaris
Jearahallamiid várás, váldde oktavuođa sámediggeráđiin Mikkel Eskil Mikkelsen (NSR), tel: 91742161, mikkel.eskil.mikkelsen@samediggi.no