Sámediggi doarju ođđa guolástusásaheami guolástusealáhusas

Sámediggi doarju ođđa guolástusásaheami guolástusealáhusas

Aron Nergård - Aron Fisk AS (g.b), Jon Helge Løkke - JH Marine AS, Thomas Henriksen - Dåfjord Fisk AS (o.b)
Sámediggi lea addán doarjaga golmma ođđa ásaheapmái guolástusealáhusain. Fitnodagaide Aron Fisk AS, Dåfjord Fisk AS ja JH Marine AS mat buohkat leat ožžon doarjaga oastit iežaset vuosttaš bivdofatnasa.

Silje Karine Muotka Árvu/Sametinget Fitnodagat leat ásahuvvon golmma iešguđege báikkis Sámedikki ealáhusovddideami doaibmaguovllus.

Aron Fisk AS váldoeaiggát lea Aron Olav Nergård ja son lea ožžon 300 000,- kruvnnu bivdofatnasa oastimii. Fitnodat ja eaiggát leat Skártavákkis Davvenjárgga gielddas.

Dåfjord Fisk AS lea ožžon 327 000,- kruvnnu bivdofatnasa ja reaidduid oastimii. Fitnodat lea Vuollevuonas Gálssá suohkanis ja dan oamasta Thomas Henriksen.

JH Marine AS eaiggáduššá Jon Helge Løkke ja lea Ráhkkerávjjus, Hámmárfeastta gielddas. Fitnodat lea ožžon 400 000,- kruvnnu bivdofatnasa ja reaidduid oastimii.

– Dát ođđa ásaheamit leat dehálaččat guolástusámmáhii rekrutteremis ollu báikkiin Sámedikki ealáhusovddideami doaibmaguovllus. Mii leat ilus go sáhttit doarjut ođđa ásahemiid doarjagiin, dadjá sámediggepresideanta Silje Karine Muotka.

Doarjagat mat oktiibuot leat 1 027 000 kruvnnu juolluduvvojit doarjjaortnegis: Vuođđoealáhusat, mariidnaealáhusaid doarjjaortnegis.

Gažaldagaide vástida dahje addá jearahallama sámediggepresideanta Silje Karine Muotka, tel. +47 984 87 576, silje.karine.muotka@samediggi.no