Soahpamuša duogážin lea ahte Sámedikkis ja Sámi Dáiddárráđis leat oktasaš beroštumit ovddidit boahtteáiggi sámi dáidda- ja kulturpolitihka. Ulbmil lea ásahit čielga njuolggadusaid, ja čielggadit goabbatbeallásaš ovddasvástádusa ja geatnegasvuođaid jahkásaš dáiddáršiehtadusain ja eará ovttasbargguin sámi dáiddapolitihka hárrái.
– Mis lei buorre ja konstruktiiva čoahkkin ovdagiiti, ja leat ovttaoaivilis mo ovddasguvlui bargat. Dat addá buori vuođu šiehtadallamiidda mat leat álggahuvvon jahkásaš dáiddáršiehtadusa birra, dadjá sámediggeráđđi Paul Bendikk Jåma (NSR).
– Sámi Dáiddárráđđái lea dát šiehtadus dehálaš danne go dat dohkkeha dáidda- ja kultursuorggi guovddáš servodataktevran. Šiehtadus láhčá dilálašvuođaid eanet strukturerejuvvon gulahallamii Sámedikki ja dáiddárorganisašuvnnaid gaskka, ja addá buori vuođu bargui viidáseappot dáiddáriid eavttuiguin, dáiddalaš ovdánemiiguin ja ealli sámi kultureallima hárrái, dadjá Sámi Dáiddárráđi stivrrajođiheaddji Klemet Anders Buljo.
Sámi dáidda- ja kultursuorggis lassánit doaimmat ja fuomášupmi, seammás go vuordámušat eiseválddiin ja eará servodatoassálastiin lassánit. Šiehtadusáigodagas galgá danne Sámediggi ja Sámi Dáiddárráđđi árvvoštallat maid dáiddárráđđi sáhttá ja berre dahkat boahtteáiggis, ja makkár rolla das galgá leat.
Ulbmil lea sihkkarastit ceavzilis ja boahtteáigásaš organisašuvnna mas lea doaibmanákca áimmahuššat viidodaga ja máŋggabealatvuođa sámi dáidda- ja kultursuorggis, ja mii lea bures vuođđuduvvon miellahttoservviide.
– Midjiide lea dehálaš ahte sámi dáiddáriin leat ovttaláganat eavttut ovdáneapmái ja doaimmaheapmái, ja dát ovttasbargošiehtadus lea buorre lávki dan guvlui, dadjá Jåma.
Ovttasbargošiehtadus meannuduvvo Sámedikki dievasčoahkkimis čakčat.
Ovttasbargošiehtadus Sámedikki ja Sámi Dáiddárráđi gaskka 2026-2029.
Sámediggepresideantta Silje Karine Muotka lea vuolláičállán šiehtadusa ovttas Sámi Dáiddárráđi jođiheddjiin, Klemet Anders Buljo:in. / Sametingspresident Silje Karine Muotka har signert avtalen sammen med styreleder i Samisk Kunstnerråd, Klemet Anders Buljo.
Sámediggi