«Sámi logut muitalit 18» almmuhuvvon

Sámi statistihka fágalaš analysajoavkku raporta «Sámi logut muitalit 18» lea odne almmuhuvvon Sámedikkis.

Loga Sámi logut muitalit 18

«Sámi logut muitalit» lea jahkásaš almmuheapmi mas sámi statistihkka kommenterejuvvo iešguđet fágasurggiin. Dán jagáš raportta sisdoalu birra muitaledje Sámi statistihka fágalaš analysajoavkku (FASS) lahtut ja čállit geat leat čállán artihkkaliid dán jagáš raportii. Sámi statistihka fágalaš analysajoavku addá rávvagiid eiseválddiide, dutkiide ja servodahkii. Raporttas leat dehálaš gávdnosat ja perspektiivvat sámi áššiid birra. 

– Dán jagi «Sámi logut muitalit» buktá ovdan dehálaš gažaldagaid sámi vuoigatvuođaid, vuoiggalašvuođa ja servodatdiliid birra. Artihkkalat fuomášuhttet movt mánát geain lea sámi gullevašvuohta šaddet oaidnemeahttumin mánáidsuodjalusa institušuvnnain, movt majoritehtaálbmot ádde soabadeami, ja makkár hástalusat sámegielat oahpaheddjiin leat dasa mii guoská oahpponeavvuide. Dasto lea guorahallon makkár ipmárdusat guolásteddjiin leat vuoiggalašvuođa birra riddoavádatplánemis, ja dasto vel movt mediat leat govvidan Fovse-ášši. Ovttas ođasmahttojuvvon statistihkalaš čoavddaloguiguin addá dát viiddis máhttovuođu ipmirdit hástalusaid ja ovdánansárgosiid sámi servodagas, dadjá FASS jođiheaddji Inger Marie Gaup Eira.

Sámediggeráđđi Maren Benedicte Nystad Storslett doalai rahpansártni. 

– Go dat lea nu, ahte jus sámi dilit eai čielggaduvvo, registrerejuvvo dahje dokumenterejuvvo, de lea maid bahá ahte dat jávket mearrádusproseassain. Dan dihte dárbbašit mii eambbo dieđuid sámi servodagaid birra. Ja juste dan dihte leat Sámi logut muitalit -raporttat nu dehálaččat. Dán almmuheami ii galgga dušše lohkat ja bidjat girjehildui. Dan galgá atnit. Dan galggašii ráđđehus atnit stuoradiggedieđáhusa hábmedettiin. Dat galggaše departemeanttat atnit bušeahttabarggus. Dan galggaše direktoráhtat, suohkanat, dutkanbirrasat ja mii, Sámedikkis, atnit, dajai son sáhkavuorustis.

Loga sámediggeráđi Maren Benedicte Nystad Storslett rahpansáhkavuoru

Dán jagi artihkkalat ja čállit:

  • Siss-Mari Solli ja Monica Skrindo Sedahl čállet das movt vuogádat dahká ahte mánát, geain lea sámi gullevašvuohta, šaddet oaidnemeahttumin fuolahusásahusain. Sin artihkal lea «Logut mat eai gierdda jávohisvuođa».
  • Eva Josefsen, Amalie Drage Habbestad ja Else Grete Broderstad guorahallet movt Duohtavuođa- ja soabadankommišuvnna ja eanetlohkoálbmoga ipmárdus lea soabadeamis.
  • Kamil Øzerk ja Hege Merete Somby čuvgeba sámegielat oahpponeavvuid dili vuođđoskuvllas. Soai vuođđudeaba dan oahpaheddjiid vásáhusaide LK20S:in.
  • Sigrid Engen, Else Grete Broderstad, Jannike Falk-Andersson, Per Fauchald ja Vera Helene Hausner guorahallet movt plánejeaddjit ja sámi, kveana ja davvinorgalaš guolásteaddjit ipmirdit vuoiggalašvuođa riddoavádatplánemis.
  • Eli Skogerbø, Roy Thowsen Krøvel, Inker-Anni Sara, Gabriella Tjelta Hansen, Bineeth Kuriakose ja Katerina Tsetsura analyserejit movt journalistihkka lea govvidan Fosen-ášši. Sii deattuhit ovddeš áiggi vearrivuođaid ja boahtteáiggi riidduid.
  • Christian Sørlien Molstad ovdanbuktá sámi statistihka duogáža. Son kommentere maiddái Statistihkalaš guovddášdoaimmahaga (SSB) bissovaš statistihkkatabeallaid.

Juogadanboalut