Golken 9.b. 1989 Majesteete Gånka Olav V dam voestes voestes Saemiedigkiem rïhpesti Karasjohken Kultuvregåetesne. Dïhte Saemiedigkiem håaloeminie tjirkijidie rïhpesti. Maahta håalomem lohkedh gånkagåetien nedtesæjrojne.
– Manne Saemiedigkiem buerie båeteme heelsem akten barkose stoerre dïedtine jïh vaajtelem dïhte gaagnine sjædta saemien åålmegasse, Majesteete Gånka Olav V. jeehti.
Abpe rïhpestimmieseremonije seedtesovvi NRK TV:sne. Desnie maahta gaskem jeatjah vuejnedh guktie göökte saemiedigkiebarkijh, Marit Myrvoll jïh Sven Roald Nystø seremonijem stuvrin. Nystø mænngan mubpine saemiedigkiepresideentine sjïdti. Magnar Mikkelsen Veidnesklubbenistie prologem Saemiedægkan lohki.
Goltelh baantedimmide Digitaalevåarhkosne
Voestes Saemiedigkie
Juktie saemiedigkiepresideente ij lij annje veeljesovveme, dellie lij Nöörjen Saemieraerien åvtehke, Aslak Nils Sara mij tjåanghkoem eelki. Dïhte tjirkijidie måjhtajehti mah veanhtadimmieh jïh maam dïedtide doh aadtjen veeljeme tjirkijh utnin.
– Saemien åålmege dijjem tjåadtjoehtæjjine åtna, sagke vielie goh aarebi gosse organisasjovni tjïrrh barkimh. Ij daate ajve politihkeles heartoeh dijjeste krïevh, men aaj jïermijesvoete juktie dejtie reaktoe sjæjsjalimmide vaeltedh tïjjen jïh vierhtiej sisnjeli. Fïerhte tjirkije dïedtem åådtjeme laaken stillemem tjïrrehtidh. Jïjtjh tjoerede jïjtsh barkoevuekieh jïh faamoetjïrrehtimmiem evtiedidh, jïh stillemem tjïrrehtidh naemhtie dijjieh toelhkestidie saemien åålmege veanhtede. Idie dijjen ajve veanhtadimmieh jïh dïedte, men aaj åålmegen dåarjoe dijjen duekesne dijjen barkosne, jeehti.
Akten åenehks håalomen mænngan tjirkijidie Aslak Nils Sara nommetjåarvomem tjïrrehti jïh birri tjirkijidie tjuedtjielidh. Dïhte luvlemes veeljemedajvine eelki, Varanger, jïh åarjese jåerhkieji Finnmarhken tjïrrh. Dïhte tjirkije mij lij jeenjemes jïenestimmieh åådtjeme fïerhtene veeljemedajvesne, stillemem åadtjoeji veeljemedokumentasjovnem deelledh tjåanghkoeåvtehkasse.
Lohkh aaj. Mojhtesetaavla skåerreste maam Majesteete Gånka Olav V vuelietjeeli goh bielie Nöörjen dokumeenteaerpeste