Öörneme

Saemiedigkieh Nöörjesne jïh Soemesne Saemien parlamentarihkeles raeriem (SPR) tseegkin njoktjen 2.b. 2000, jïh Saemiedigkie Sveerjesne meatan laavenjostose sjïdti voerhtjen 2. b. 2002.

Saemien organisasjovnh Russlaanten bieleste tjirkijh utnieh Saemieraeresne, jïh nimhtie aaj ihkuve lïhtseginie SPR-laavenjostosne. Dah utnieh soptsestimmie- jïh raeriestimmiereaktah stoerretjåanghkojne jïh sijjen tjirkijh veeljieh.

Laavenjostoelatjkoe Saemiedigkiej gaskem maam dah goevten 25. b. 2002 dåhkasjadtin, jïh SPR:n barkoeöörnege våaroeminie parlamentarihkeles laavenjostose. Ulmie lea laavenjostoem nænnoestidh aamhtesinie mah saemide raasti rastah dijpieh, jïh viehkiehtidh saemieh maehtieh gïelem, kultuvrem jïh seabradahkejielemem vaarjelidh jïh evtiedidh sijjen laantesne jïh aktine åålmeginie.

Saemien parlamentarihkeles raeresne 21 parlamentarihkerh. Fïerhte saemiedigkie 5 tjirkijh raaran veeljie akten 4 jaepiej boelhkese. Veeljeme dorjesåvva voestes stoerretjåanghkosne saemiedigkieveeljemen mænngan. Lissine aaj åejvieh saemiedigkiej reereles orgaanijste jïh akte lïhtsege fïerhtede saemiedigkiej ståvroste jallh raereste meatan årroeh. Saemieh Russlaanten bieleste göökte tjirkijh meatan årroeh mejtie dah saemien organisasjovnh mah leah lïhtseginie Saemieraeresne veeljieh.

Stoerretjåanghkoe lea raerien bijjemes nænnoestimmieorgaane. Ektieståvroe dam fïerhten beajjetje reeremem dorje, jïh desnie 6 tjirkijh, dej gaskem saemiedigkiej reereles orgaani åvtehkh. Dah golme jeatjah tjirkijh SPR veeljie, aktem fïerhtede saemiedigkeste.

SPR aktem presideentem jïh göökte nubpiepresideenth veeljie. Dah saemiedigkieh molsestellieh åvtehkinie årrodh. Saemiedigkie Nöörjesne presideentem åtna tsïengelen 16. b. 2025 raejeste.

Ij leah SPR:n jïjtjen budsjedte jallh tjaelijebarkijh. Raerien barkoe lea saemiedigkiej sïejhme budsjedtemieriej sisnjelen. Tjaelijebarkijh båetieh dehtie saemiedigkeste mij presideentem åtna.

Barkoesuerkie jïh våaroehtimmieh          

Saemien parlamentarihkeles raerie (SPR) aamhtesi gujmie barka mah saemieh aktine åålmeginie dijpieh. Raerie galka politihkeles gïetedimmiem iktedidh tjåenghkies aamhtesijstie raasti rastah, laavenjostoem saemiedigkiej gaskem nænnoestidh jïh saemide Soemesne, Nöörjesne jïh Sveerjesne representeeredh noerhtelaanti jïh gaskelaanti forumine.

SPR dahkoesoejkesjem fïerhten stoerretjåanghkojne dåhkasjadta. Dahkoesoejkesjem mij faamosne daelie dåhkasjadti tsïengelen 16. b. 2025.

Lohkh SPRen dahkoesoejkesjem 21.09.23 raejeste (PDF, 414 kB)

Daan boelhken SPR daejtie suerkide våaroehteminie:

• SPR:n öörneme jïh beetnehvierhtieh
• saemien gïele, ulmine ihkuven beetnehvierhtieh Gïelegaaltijasse
• barkedh Noerhtelaanti saemienkonvensjovnine
• saemiedigkieveeljemh iktedidh Soemesne, Nöörjesne jïh Sveerjesne
• raasti heaptojde gaavnedh jïh dejtie sliejhtedh mah laavenjostoem gaertjiedieh saemien dajvine 
• raasti rastaj laavenjostoe juvrepolitihken bïjre
• FN-prosessem vaaksjoehtidh guktie aalkoeåålmegi meatan årromem FN-systeemesne tjirkedh 
• meatan årromem jih dijpemem tjirkedh EU:sne jïh Noerhtelaanti raeresne
• maanagïerte- jïh skuvlefaaleldahken bïjre laavenjostedh raasti rastah
• saetniesvoete- jïh liktemeprosessi bïjre ektine barkedh mah saemide dijpieh
• meatan årromem jïh dijpemem tjirkedh saemienoeride saavresisnie
• buerebe maahtoem seksuelle- jïh tjoeleunnebelåhkoej tsiehkien bïjre tjöönghkedh, jïh aaj aemieluesemen vööste laavenjostedh

Ektieståvroe statusen bïjre reektehte jïh guktie åvtese barkedh dahkoesoejkesjinie fïerhten stoerretjåanghkosne. Råajvarimmieh tjïrrehtuvvieh saemiedigkien gaavnoes reereles vierhtiej jïh budsjedtemieriej sisnjelen.

Gaskenasjonaale laavenjostoe

Saemien parlamentarihkeles raerie (SPR) lea tseegkemen mænngan eadtjohkelaakan gaskenasjonaalesne barkeme. Saemiedigkieh nænnoestamme barkoe gaskenasjonaali aamhtesi gujmie galka eeremes SPR:n tjïrrh iktedovvedh. Vihkeles ulmine SPR galka maehtedh gaskenasjonaali aalkoeåålmegi prosessine meatan årrodh jïjtsh kapasiteetesne jïh saemide ryöktesth representeeredh.

SPR 2001 raejeste meatan orreme arktihken parlamentarihkeleslaavenjostosne ihkuven lïhtseginie Arktihken parlamentarihkelesmoenehtsisnie. Moenehtse lea Arktihken raerien vuestiebielie jïh tjirkijh tjöönghkie noerhtelaantijste, Canadeste, USA:ste, Europa-parlameenteste jïh jeatjah aktöörijste. Fïerhten mubpien jaepien arktihken parlamentarihkeleskonferaanse öörnesåvva gusnie SPR lea meatan jïjtse delegasjovnine.

Jaepien 2011 SPR vïhtesjæjjine sjïdti WIPO:n gaskenasjonaale moenehtsisnie immaterijellereaktan, genetihkeles vierhtiej, aerpievuekien maahtoen jïh folkloren bïjre. 

Saemiedigkieh leah aaj vïhtesjæjjine Noerhtelaanti raeresne jïh maehtieh meatan årrodh raerien digkiedimmine jïh sesjovnine. SPR:n presideente Noerhtelaanti raerien aamhtesesesjovnide bööresåvva. Jaepien 2014 SPR ellies lïhtseginie Noerhtelaanti raaran syöki, mij lea dïhte byjjes parlamentarihkeles laavenjostoeorgaane Noerhtelaantine.

Saemieparlamentarihkerekonferanse

Fïerhten gåalmeden jaepien saemieparlamentarihkekonferaanse öörnesåvva, gusnie politihkerh Saemiedigkijste jïh tjirkijh saemien organisasjovnijste Russlaanten bieleste meatan årroeh.

Daesnie saemieparlamentarihkekonferaansh öörnesovveme: 

• 2005: Jåhkåmåhkke/Jokkmokk 
• 2008: Ruávinjargâ/Rovaniemi
• 2011: Kirkonjárga/Kirkenes 
• 2014: Ubmeje/Umeå
• 2017: Tråante/Trondheim 
• 2022: Anár/Inari 
• 2023: Árviesjávrrie/Arvidsjaur 

Saemien parlamentarihkerh 7. parlamentarihkekonferaansesne Árviesjávrrie Kent Norberg