ILO konvenšuvdna nr. 169 álgoálbmogiid ja čearddalaš álbmogiid hárrái iešmearrideaddji stáhtain (ILO-169) mearriduvvui ILO generálakonferánssas geassemánu 27. beaivvi 1989. ILO-169 váldoprinsihppa lea eamiálbmogiid vuoigatvuohta bisuhit ja ovddidit iežaset kultuvrra, ja eiseválddiid geatnegasvuohta dahkat mearrádusaid mat dorjot dán barggu.
Ráđđehus celkkii juo go ratifiserii konvenšuvnna ahte Sámedikkis galgá leat rolla konvenšuvnna gustojumi goziheamis. 1996:s šiehtaiga ráđđehus ja ILO ahte Sámediggi galggai beassat njuolga gulahallat ILO áššedovdikomiteain ja sáhttit ovddidit sierra raporttaid konvenšuvnna dulkojumi ja doahttaleami birra. Sámediggi raportere dan dihte njuolga ILO:i ILO-169 birra seamma áigodagas go Norga dahká ja dát boahtá lassin Norgga raporteremii.
Norga raportere ILO-169 birra ILO áššedovdikomiteai juohke viđat jagi.
Loga Norgga 6. raportta, áigodahkii geassemánu 1. beaivvi 2013 rájes miessemánu 31. beaivvi 2018 rádjai
Meannuduvvui dievasčoahkkimis
Sámedikki raporteren ILO-konvenšuvnna nr. 169 ektui álgoálbmogiid ja čearddalaš álbmogiid hárrái iešmearrideaddji stáhtain meannuduvvui dievasčoahkkimis čakčamánus 2018.
Sámediggi čujuha raportii maid Norgga stáhta lea dahkan ILO-konvenšuvnna nr 169 birra álgoálbmogiid ja čearddalaš álbmogiid hárrái iešmearrideaddji stáhtain (ILO-169) áigodahkii 01.06.2013 – 31.05.2018.
Sámediggi vuordá ahte stáhta láhčá stáhtalaš ekonomalaš ja juridihkalaš rámmaid nu ahte Sámediggi galgá sáhttit doaimmahit sámi servodatovddideami. Sámi álbmot eallá lávgalagaid norgalaš servodagain ja lea eanaš háviid sorjavaš das ahte Norgga stáhta váldá vuhtii sámiid ja heiveha lágaid, doaibmabijuid, ortnegiid ja norgalaš almmolaš bálvalusaid sámiide.
Sámediggi deattuha sávaldaga ahte oažžut stuorát láhkaásahusválddi ja hálddašanovddasvástádusa servodatsurggiin mat váldoáššis gusket sámi álbmogii. Sámedikki mielas lea deaŧalaš prinsihppa ahte lágaid Norggas mearrida Norgga láhkaaddiváldi, Stuorradiggi. Stáhta ii dattetge sáhte mearrádallat Sámedikki badjel, ja ferte danne čielgasit boahtit ovdan lágas makkár ovddasvástádussurggiin lea Sámedikkis váldi.
Sámediggi áigu dán vuođul sáddet raportta Norgga beale Sámedikki beales ILO-konvenšuvnna nr 169 birra álgoálbmogiid ja čearddalaš álbmogiid hárrái iešmearrideaddji stáhtain (ILO-169) áigodahkii 01.06.2013 – 31.05.2018 ILO áššedovdikomiteai.
Loga Sámedikki ILO-raportta 2018,áigodahkii geassemánu 1. beaivvi 2013 rájes miessemánu 31. beaivvi 2018 rádjai (PDF, 665 kB)
The Sami Parliament ILO Report 2018 (PDF, 688 kB)