Gærjapaahkh

Gaajhkh gærjagåetieh maehtieh gærjapaahkh (våarhkoe) mijjen luvnie löönedh. 

Mijjen lea stoerre våarhkoe dovne faagelidteratuvreste jïh tjiehpieslidteratuvreste maanide jïh geerve almetjidie, ovmessie saemien gïeline. Lissine maahta dovne DVD:h, CD:h jïh tjoejegærjah mijjeste löönedh. Gaajhke tjåanghkan bïejesåvva löönijen/gærjagåetien sjaavnjoej mietie. Gåarede guhkiebasse löönedh.

Gaskesadth mijjem gærjapaahki bïjre daesnie:

Naestievåarhkoe

Naestievåarhkosne medtie 1200 tihtelh, mah leah saemien tsiehkiej bïjre jallh leah tjaalasovveme aktene dejstie saemien gïelijste. Jeanatjommes dejstie tihtelijstie lea vielie goh 100 jaepien båeries.

Våarhkosne dïpmebaaletje, sveekes, båarasåbpoe jïh vyörtegs gærjah jïh tjaalaldahkh, jïh såemies kaarhth bååstede jaapan 1669. Lissine såemies tihtelh dejstie minngemes 100 jaepijste mah sjïere aarvoem utnieh.

Daelie aadtjen våarhkoem gïehtjedamme jïh gaajhkh tihtelh leah registreereme gærjagåetiesysteemesne. Gåarede dan åvteste dej mietie syökedh seammalaakan goh jeatjah tjaatsegi mietie syökoe. Doh jeanatjommes tjaatsegh naestievåarhkosne låhkoeh utnieh magasijnesne mejtie gåarede löönedh, men ij gåaredh låhkoeh naestievåarhkosne löönedh. Maahta muvhti veajkoej dejtie veedtjedh jïh lohkedh gærjagåetesne.

Aalkoealmetjevåarhkoe

Saemiedigkien gærjagåetie aktem jïjtse aalkoealmetjevåarhkoem tseegki 2014.

Aalkoealmetjevåarhkosne tjaatsegh aalkoealmetji bïjre abpe veartenisnie, jïh desnie medtie 200 tihtelh. Gærjah mejtie Saemiedigkie lea tjöönghkeme jïh vadtesinie åådtjeme leah registreereme jïh dïllesasse dorjeme löönemasse/maajelöönemasse.