Lohkh stoerretjåanghkoeaamhtesem: Saetniesvoete- jïh liktemekommisjovnen reektehtse – Saemiedigkien bijjemes vuarjasjimmieh

Gïetesåvva Soejkesje- jïh finansemoenehtsisnie..

Tjåadtjoehtæjja: raerielïhtsege Runar Myrnes Balto

Saemiedigkieraerie raereste akte jïjtse orgaane Stoerredigkien nualan tseegkesåvva mij edtja barkoen bïjre åvtese reektedh dennie guhkiebasse barkosne Saetniesvoete- jïh liktemekommisjovneste.

Saemiedigkieraerie raeriestimmiem maahtoejarngen bïjre dåarjohte gusnie daaroedehtemepolitihken bïjre beavna, men tjierteste organiseereme tjuara daerpiesvoetem voenges bievniemasse krööhkestidh gaajhkine dajvine, jïh tjuara daajroebyjresh krööhkestidh, mah joe gååvnesieh. Lissine daerpiesvoetese orre institusjovnide saemien dajvine tjuvtjede.

Saemiedigkieraerie raereste abpe seabradahke meatan bööresåvva prosessesne. Saemiedigkieraerie juvnehte institusjovnh, organisasjovnh, fylhkh jïh tjïelth edtjieh vuartasjidh magkeres råållam dah leah åtneme histovrijen tjïrrh, jïh guktie dej barkoe saemien tsiehkieh baajnehte daanbiejjien. Dah bööresuvvieh jïjtsh prosessh tjïrrehtidh, jïh skraejriem veedtjedh Ööhpehtimmiesiebreste jïh Nöörjen gærhkoste.

Saemiedigkieraerie aamhtesisnie raereste Saemiedigkie stoerre solidariteetem kveenigujmie/nöörjensoemeladtjigujmie jïh skåajjesoemeladtjigujmie vuesehte.