Lohkh stoerretjåanghkoeaamhtesem:  Saetniesvoete jïh likteme – Almetji åasah 

Gïetesåvva  Byjjenimmie-, hokse- jïh ööhpehtimmiemoenehtsisnie.

Tjåadtjoehtæjja: raerielïhtsege Runar Myrnes Balto

Kommisjovne lea veelelaakan dokumenteereme gellie såarhts ovreaktah saemien årroji vööste. Saemiedigkieraerie meala reektehtse gaajhkesidie vuastele mah vienhtieh doh åasah almetjh leah tjoereme maeksedh daaroedehtemen jïh ovreaktan gaavhtan lea naakede mij govlehtuava åvtetje aajkan. Histovrijes ovreakta annje konsekvensh åtna aktegsalmetjidie daan biejjien, jïh jïjnje maam tjuara dåvvodh. 

Saemiedigkieraerie gellie raeriestimmieh dåarjohte mejtie kommisjovne buakta, dej gaskem råajvarimmieh saemielaavsemen vööste, evtiedimmie healsoefaalenassijste, råajvarimmieh vædtsoehvoeten vööste, råajvarimmieh mah aemieluesemem hööptieh, dotkeme jïh vijriesåbpoe daajroeevtiedimmie.

Saemiedigkieraerie gaskem jeatjah daerpiesvoetem tjierteste orre organiseeremen bïjre dejstie saemien healsoedïenesjijstie, guktie dah hijven evtiedimmienuepieh åadtjoeh, jïh daerpiesvoete sagke vijriesåbpoe dotkemasse ektiedimmiej bïjre daaroedehtemen jïh ov-healsoen gaskem, daan beajjetje seabradahkesne.

Saemiedigkieraerie raereste gaskem jeatjah vuartasjidh guktie sjïereskuvlh, vuesiehtimmien gaavhtan bieljievaanehkeskuvlh, leah daaroedehtemem vadteme. Akte jeatjah raeriestimmie lea reaktakompensasjovne saemide mah skuvlem teehpeme revideereme sjædta, guktie jienebh maehtieh dam nuhtedh jïh maaksoesumme læssene.