Gïetesåvva Jieleme- jïh kultuvremoenehtsisnie.

Tjåadtjoehtæjja: Silje Karine Muotka

Saemiedigkieraerie kommisjovnen raeriestimmiem dåarjohte, jïh våaroemasse beaja hööpteme tjuara sjugniehtovvedh illemen tjïrrh almetjereaktijste jïh jarkelimmien tjïrrh seabradahkestruktuvrijste mejtie lea eerpeme daaroedehtiemistie. Deadtove aerpievuekien jieliemidie jïh åtnoe areaalijste jïh nuhteme eatnemevierhtijste lea akte iktemierien, teema jïh maadthfåantoeh dejtie vigkide nöörjen jïh saemien årroji gaskem. Gellie råajvarimmieh doh minngemes jaepieh leah aerpievuekien åtnoedajvh vaalteme, dovne eatnamisnie jïh mearosne. Tjåanghkan daah skilkehtassh leah stoere konsekvensh saemien seabradahkese åtneme.

Mearoesaemiej reaktah mearoegöölemasse laakine vihtiestidh lea eevre vihkeles råajvarimmie, lissine reaktagoerehtallemem tjïrrehtidh jïh båatsoen areaaletsiehkiem vuartasjidh.

Saemiedigkieraerie lissine raereste doh guejmieh mej bïjre lea, hijven mekanismh, nuekieh vierhtieh jïh barkoefaamoem dejnie prosessine åadtjoeh mah leah vierhtie- jïh areaalenuhtemen bïjre.