Ohcanáigemearri

• 30.08.24 dii. 16.00.

Ohccit fertejit logget sisa ID-porten bokte.

Ohcanskovvi (gáibida sisaloggema)

Dán ortnega njuolggadusat

1 Doarjjaortnega mihttomearri ja vuoruheamit

1.1 Doarjjaortnega mihttomearri

• Giellaberošteaddjit čalmmustit ja nannejit sámegiela geavaheami Sámi giellavahku áigge.

1.2 Vuoruheamit

• Sámi gielladoaimmat mat čađahuvvojit Sámi giellavahku olis ja erenoamážit deattuhit giela, sániid ja doahpagiid oahpaheami.

1.3 Ulbmilolahusa eavttut

• Doaimmat mat addet oahppanbohtosiid ja čađahuvvojit Sámi giellavahkus.
• Doaimmat maid bokte olbmot sániid ja doahpagiid, ja mat čađahuvvojit Sámi giellavahku.
• Doaibmabijut mat váikkuhit ahte sámegiella geavahuvvo aktiivvalaččat.

2 Ohcama sisdoallu ja hápmi

2.1 Doarjjaoažžu / Gii/geat sáhttá ohcat

• Almmolaš ja priváhta organisašuvnnat/ásahusat/fitnodagat mat leat registrerejuvvon Norgga Ovttadatregistarii.
• Sámi giellaguovddážat geat ožžot njuolggodoarjaga Sámedikki bušeahta bokte eai sáhte oažžut doarjaga.

2.2 Ohcanáigemearri

• Sámediggeráđđi mearrida ohcanáigemeari.

2.3 Gáibádusat ohcamii

• Sámedikki digitála doarjjaportála galgá geavahuvvot.
• Ohcamat mat eai ollašuhte ohcaneavttuid hilgojuvvojit.
• Ohcan galgá leat Sámedikki doarjjaortnega vuoruhemiid siskkobealde.
• Prošeavtta/doaimma ollislaš gollogeahčastat ja ruhtadanplána galgá čuovvut ohcama, maiddái eará vejolaš almmolaš doarjagat.
• Golut ollislaš gollogeahčastagas galget dokumenterejuvvot haddefálaldagaiguin.
• Ollislaš prošeaktačilgehus mii čilge prošeavtta ulbmila, fágalaš sisdoalu, ulbmiljoavkku, ovdánanplána ja plánejuvvon gárvvistanáigemeari galgá čuovvut ohcama.
• Ohcamis galgá leat čilgehus movt guoddevašvuohta/birgejupmi lea áimmahuššon prošeavttas.
• Sus guhte vuolláičállá ohcama, ferte leat fápmudus geatnegahttit fitnodaga/ásahusa.
• Ohcan ferte sáddejuvvon Sámedikki doarjjaportálii ovdalgo prošeakta/doaibma lea álggahuvvon.
• Ohcci lea geatnegahtton addit buot dieđuid mat leat dárbbašlaččat ohcama meannudeapmái.
• Iežas barggu viidodat galgá árvvoštallot dalle go ohca ja čilgejuvvot ohcamis. Iežas barggus gáibiduvvo vuolláičállon diibmolistu ja mearriduvvon diibmobálká.

3 Ohcamiid meannudeapmi

3.1 Ohcamiid meannudeapmi

• Ohcamat árvvoštallojuvvojit guoddevašvuođa, ekonomalaš, márkaniidguoski, teknihkalaš, servodatlaš ávkki, ehtalaš, fágalaš ja eará guoskevaš beliid vuođul. Sámediggi deattuha erenomážit dásseárvo- ja máŋggabealatvuođaperspektiivva áššemeannudettiin.
• Sámediggi viežžá kredihttadieđuid ohcci birra.
• Váilevaš raporteremat ja gárvvisteami maŋŋoneamit ovddeš doarjjaáššiin sáhttet váikkuhit ohcama meannudeapmái.

3.2 Mearrádus ja dohkkeheapmi

• Doarjjaoažžu galgá ovdal go lea gollan 3 vahku doarjjareivve dáhtona rájes dohkkehit doarjjaeavttuid Sámedikki doarjjaportála bokte. Jos Sámediggi ii oaččo eavttuid dohkkeheami, sáhttá doarjja sihkkojuvvot duođi eanet dieđitkeahttá.
• Sus guhte dohkkeha doarjjaeavttuid, ferte leat fápmudus geatnegahttit fitnodaga/ásahusa jna.

3.3 Eavttut doarjjaožžui

• Doarjjaoažžu galgá almmuhit ahte Sámediggi lea dorjon doaibmabiju/prošeavtta.
• Seamma prošeakta/doaibmabidju ii sáhte oažžut doarjaga máŋga doarjjaortnega bokte Sámedikkis.
• Maŋŋá doarjjamearrádusa de dábálaččat ii addojuvvo eanet doarjja seamma doaibmabidjui/prošektii.
• Doaimmat ja lágideamit galget čađahuvvot Sámi giellavahkus, ja galget registrerejuvvot sihke sámegillii ja dárogillii deike: https://giellavahkku.org/sme/legg-til-arrangement/.

3.4 Gárvvistanáigemearri

• Prošeavttat/doaimmat galget čađahuvvot dan jagi Sámi giellavahku olis go doarjja juolluduvvo.
• Prošeavtta gárvvistanáigemearri lea jahkebeali maŋŋá doarjjareivve beaivádeami.
• Erenoamáš ákkaid vuođul sáhttá doarjjaoažžu čálalaččat ohcat guhkit áigemeari prošeavtta/doaibmabiju gárvvisteapmái, gitta jahkái. Ohcan galgá vuođustuvvot.

3.5 Rievdadusat doarjjaeavttuin

• Doarjjaoažžu ii sáhte čađahit mearkkašahtti rievdadusaid guoskevaš prošeavttas dahje doaibmabijus ovdalgo lea čálalaččat dieđihan Sámediggái ja ožžon Sámedikki čálalaš dohkkeheami. Dohkkehuvvon ruhtadanplána ja investerenplána rievdadeapmi adnojuvvo álo mearkkašahtti rievdadussan.

3.6 Máksineavttut

• 100 % doarjagis máksojuvvo dalle go prošeakta/doaibmabidju álggahuvvo ja 50 % dalle go prošeakta lea loahpahuvvon ja Sámediggi lea dohkkehan raporta ja rehketdoalu.
• Jos ohcci ovdal lea ožžon doarjaga Sámedikkis ja doarjjaoažžu lea rihkkon doarjjaeavttuid, de sáhttá dat dagahit dan ahte máksimat bissehuvvojit dassážiigo eavttuid rihkkun lea nohkan.

4 Meroštallannjuolggadusat, definišuvnnat ja EEO-njuolggadusat

4.1 Meroštallannjuolggadusat

• Doarjja rehkenastojuvvo vuođustuvvon ohcama ja prošeaktačilgehusa vuođul, gitta 40 000 ru rádjai.
• Golut maidda ii sáhte oažžut doarjaga:
  • Prošeavttaide mat gullet oahpahuslága doaibmaguvlui ja mat gullet skuvlaeaiggádiid láhkageatnegahttojuvvon bargamušaide.
  • Girjjálašvuođa, neahttasiidduid ja diehtojuohkinávdnasiid jorgaleapmái.
  • Oastit elektronihkalaš gálvvuid ja duhkorasaid.
• Doarjja ii addojuvvo dása:
  • elektronihkalaš gálvvuid, duhkorasaid, bajásdoallamii, spesifiserekeahtes goluide, beaivválaš doaibmagoluide jođihit doaimma/fitnodaga, sosiála goluide, doaibmabijuide mat botnjet gilvvohallama, láigovisttiide, rádjovisttiide, opmodatoastimiidda, leasingii, vuodjinfievrruide, investeremiidda ja čielga lonuhemiide. Eará olggosgolut maid Sámediggi ii árvvoštala dárbbašlažžan doaimma čađaheapmái.
• Almmolaš doarjja oktiibuot ii sáhte leat badjel 100 % prošeavtta/doaibmabiju ollislaš olggosgoluin.

4.2 Definišuvnnat

• Doaibmagollun lohkkojuvvojit: rehketdoallo- ja revišuvdnabálkkát, reantogolut, divadat, eará finánsagolut, vearro- ja divatgolut, elrávdnji, lokálagolut, dáhkádusat, penšuvdnagolut, sosiálagolut, eará bargiidgolut, stivrabálkkát, stivragolut, fitnodatčoahkkin- ja váldočoahkkingolut, árvonjeaidimat ja -geahpedeamit.
• Sosiálagollun lohkkojuvvojit: bargiid skeaŋkkat, bargiid kurssat, friija kantiidna ja eará sullasaš ovddut.
• Vuodjinfievrun lohkkojuvvo: vuodjinfievru mii lea mohtorfievroláhkaásahusa nuppi kapihttala mielde (FOR-1994-10-04-918 Láhkaásahus vuodjinfievrruid teknihkalaš gáibádusaid ja osiid ja biergasiid dohkkeheami birra (vuodjifievroláhka).
• Investeremin lohkkojuvvo oamastusoassi mii bistá ja man geavahanáigi lea 3 jagi ja gollohaddi lea 15 000 ru dahje eanet earret momssa (guoská momsageatnegasaide).

4.3 EEO-njuolggadusat

• Sámedikki doarjjaortnegat fertejit leat EEO-šiehtadusa njuolggadusaid rámmaid siskkobealde stáhta doarjaga ektui. Sámediggái gusket EEO-šiehtadusa mearrádusat seamma láhkai go stáhta- gieldda- ja fylkkahálddašeapmái dan ektui movt almmolaš doarjagat galget juolluduvvot.
• Doarjja juolluduvvo EEO-šiehtadusa njuolggadusaid vuođul binnánaš doarjagiid birra. Njuolggadusat binnánaš doarjagiid birra čuvvot skábmamánu 14. b. 2008 láhkaásahusa nr 1213. Dáid njuolggadusaid mielde ii sáhte doarjjaoažžu vuostáiváldit binnánaš doarjaga eanet go oktiibuot 200 000 Euro ovtta dahje máŋgga sajis 3 jagi rehketdoallojagi áigodagas.
• Ovdalgo doarjaga sáhttá máksit ferte doarjjaoažžu duođaštit Sámediggái ahte ii oaččo binnánaš doarjaga eará sajis máksinjagi dahje guovtti ovddit jagiin mat oktiibuot Sámedikki doarjagiin gaskamearálaččat eai leat eanet go 600 000 Norgga ruvnnu. Vejolaš ođđa almmolaš doarjjaohcamiid oktavuođas (beroškeahttá gos oažžu doarjaga) lea doarjjaoažžus geatnegasvuohta dieđihit dán doarjaga birra. Dieđihangeasku gusto 3 rehketdoallojagi fálaldatáigemeari rájes.
• ESA sáhttá geatnegahttit norgga eiseválddiid, maiddái Sámedikki, gáibidit doarjaga ruovttoluotta doarjjaoažžus jos doarjja ii leat addojuvvon njuolggadusaid mielde dahje doarjjaoažžu ii geavat doarjaga dan ulbmilii masa lea addojuvvon.

5 Raporteren

5.1 Ulbmilolahusa eavttuid raporteren

• Doarjjaoažžu raportere bohtosiid prošeavtta/doaibmabiju mihttomeari ektui. Dáid vuođul galget ulbmilolahusa eavttut raporterejuvvot:
  • Mot lea prošeakta váikkuhan sámegiela oahppamii, ja sámegiela geavaheapmái Sámi giellavahkkus.
  • Prošeavtta ulbmiljoavku.
  • Čilgehus mot prošeakta lea čađahuvvon.
  • Makkár doaimmat ja lágideamit leat čađahuvvon.
  • Galle oasseváldi leat oassálastán doaimmain.
• Raporteren galgá dahkkot Sámedikki doarjjaportála bokte.

5.2 Rehketdoalu raporteren

• Rehketdoalu raporteren galgá dahkkot Sámedikki doarjjaportála bokte.
• Rehketdoallu ruđaid geavaheamis galgá čájehit ollislaš goluid ja dietnasa. Dasa gullet prošeavtta/ doaibmabiju eará vejolaš doarjagat ja dietnasat. Rehketdollui galgá váldit mielde dušše dakkár goluid ja dietnasiid mat njuolga leat čadnojuvvon prošeavtta/doaibmabiju čađaheapmái.
• Dalle go lea dohkkehuvvon gollomeroštus, galgá rehketdoallu leat bardojuvvon nu ahte dan sáhttá buohtastahttit gollomeroštusain. Stuorra spiehkastagaid dohkkehuvvon gollomeroštusa ja rehketdoalu gaskka galgá kommenteret.
• Jos loahpalaš golut prošeavtta/doaibmabiju rehketdoalus leat unnit go dohkkehuvvon gollomeroštus mii boahtá ovdan mearrádusas, de unnida Sámediggi doarjaga vásttolaččat.
• Rehketdoallu ruhtageavaheamis galgá duođaštuvvot ná:
  • Vuollel 100 000 ruvdnosaš doarjaga ruhtageavaheapmi galgá duođaštuvvot dohkkehuvvon rehkegiin ja báŋkoduođaštusain ahte rehket lea mákson.
  • Badjel 100 000 ruvdnosaš doarjaga ruhtageavaheami rehketdoalu galgá stáhtaautoriserejuvvon dahje registrerejuvvon revisora/rehketdoalli duođaštit.
• Revišuvdnagáibádus ii guoskka ásahusaide maid suohkanrevišuvdna ja Riikarevišuvdna reviderejit.
• Doarjjaoažžu gii lea registrerejuvvon lassiárvoregistaris, galgá rehketdoalus čájehit goluid ja dietnasiid lassiárvodivada haga. Dát ii guoskka sidjiide geat leat luvvejuvvon lassiárvodivadis dahje ožžot spiehkastit momsadivada rehkenastimis.
• Iežas barggu raporterema oktavuođas gáibiduvvo vuolláičállon diibmolistu. Diibmolistu devdojuvvo Sámedikki doarjjaportálii.

5.3 Bearráigeahččan ja čuovvuleapmi

• Sámediggi sáhttá dárkkistit geavahuvvojit go ruđat eavttuid mielde.
• Sámediggi sáhttá bivdit eanet dieđuid. Dát guoská dieđuide mat galget geavahuvvot statistihkkii ja eará raporteremii.

5.4 Doarjaga ruovttoluotta máksin ja sihkkun

• Prošeavtta gárvvisteami oktavuođas galget geavatkeahtes doarjjaruđat máksojuvvot ruovttoluotta Sámediggái.
• Sámediggi gáibidit doarjaga ruovttoluotta máksojuvvot jos dat lea máksojuvvon menddo ollu.
• Sámediggi geassá doarjjalohpádusa ruovttoluotta, dolle doarjaga dahje gáibida ahte doarjja máksojuvvo ruovttoluotta jos:
  • Doarjjaoažžu lea rihkkon dieđihangeaskku.
  • Doarjjaoažžu lea rihkkon dáid njuolggadusaid mearrádusaid.
  • Doarjja ii geavahuvvo doarjaga ulbmila mielde ja daid eavttuid mielde mat leat mearriduvvon doarjjareivves.
  • Lea gáibiduvvon heaittiheapmi, ovddiduvvon reastaluvvangohčus, priváhta dahje almmolaš vealgešiehtadallamat leat rahppojuvvon doarjjaoažžu ektui dahje doarjjaoažžu heaitá máksimis máksámušaidis.
  • Doarjjaoažžu lea vuovdán iežas investeremiid ovdal go vihtta jagi lea gollan. Dát guoská investeremiidda maidda Sámediggi lea juolludan doarjaga.
• Jos doarjjaoažžu dákkár oktavuođain ii mávsse ruovttoluotta, de sáhttá Sámediggi rievtti bokte gáibidit máksojuvvot dan mii lea buorrin. Jos ruđat eai máksojuvvo ruovttoluotta dan áigemeari sisa mii lea biddjojuvvon, de sáhttá gáibidit maŋŋoneami ovddas reanttuid vel lassin, gč. juovlamánu 17. b. 1976 mannosaš lága nr. 100 reanttuid birra maŋŋonan máksima oktavuođas jna.