Surgadis logut dáččaid miellaguottuid birra sápmelaččaide

Surgadis logut dáččaid miellaguottuid birra sápmelaččaide

Norgga olmmošvuoigatvuohtaásahus (NIM) lea odne almmuhan raportta dáččaid miellaguottuid birra sápmelaččaide ja nationála unnitloguide. Sámediggeráđđi Runar Myrnes Balto (NSR) mielas leat miellaguoddoguorahallama bohtosat surgadat.

– Iskkadeapmi čájeha ahte mis lea stuora miellaguoddováttisvuohta, erenoamážit sámi árbevirolaš ássanguovlluin. Go 11 proseanttas lea heajos govva sápmelaččain Davvi-Norggas, de dat čielgasit čájeha ahte rasistalaš jurddašanvuohki mii lei dutkanproseassas lea ain bistime, dadjá sámediggeráđđi Runar Myrnes Balto (NSR).

Loga ođđa NIM-raportta: «Holdninger til samer og nasjonale minoriteter i Norge»

Duohta lohku lea ahte badjel 50.000 olbmuin davimus fylkkain leat heajos miellaguottut sápmelaččaide.

Runar Myrnes Balto– Dát lea balddihahtti, dadjá Myrnes Balto. 

Eará mearkkašahtti fuomášupmi lea ahte 33 proseantta Davvi-Norgga olbmuin, 24 proseantta lullisámi guovlluin,  ja 15 proseantta nationála olbmuin leat vásihan ahte sápmelaččat cielahuvvojit.

– Dát duođašta juoidá maid mii guhká leat diehtán, ahte sámecielaheapmi lea stuora servodatváttisvuohta, mii gáibida nana áŋgiruššama jus das galgá  beassat, dadjá Myrnes Balto.

Su mielas fertejit eiseválddit duođas váldit raportta loguid ja čuovvulit ávžžuhusaid maid dál ožžot NIM:s, earret eará nationála gelbbolašvuođaloktema ja sierra doaibmaplánaid birra.

– Ráđđehus ii sáhte badjelgeahččat váttisvuođa. Dál lea sihke NIM, Cealkinfriddjavuođakommišuvdna ja ovttajienalaš Sámediggi dáhtton sierra doaibmaplána sámevaši ja sápmelaččaid vealaheami vuostá, lohká sámediggeráđđi.

Ovttajienalaš Sámediggi mearridii geassemánus sierra doaibmaplána sámecielaheami vuostá, mas leat 17 konkrehta doaimma.

– Sámediggi áŋgiruššá garrasit eastadit sámevaši, muhto lea mearri maid mii iehčanassii nákcet olahit. Mii dárbbašit veahki stuorraservodagas, ja leat gergosat ovttasbargat ráđđehusain dán dehálaš barggus, loahpaha sámediggeráđđi Runar Myrnes Balto.

Loga Sámedikki doaibmaplána sámecielaheami vuostá