Jienebh ööhpehtamme faagebarkijh fååtesieh dej ovmessie siebriedahkesuerkiej sisnjeli mej maahtoe saemien gïelesne jïh saemien kultuvresne. Naemhtie abpe laantesne, jïh joekoen lïerehtimmien jïh healsoen sisnjeli.
Faagemaahtoe-vaanoe åejviefåantojne neebnesåvva man åvteste tjïelth saemien gïelen reeremedajvesne eah sijjen åeliedimmieh saemielaaken gïelenjoelkedassi mietie illh. Dan åvteste daerpies gamte barkojne dåårrehtimmine jïh lïerehtimmine faagealmetjijstie juktie saemien dïenesjefaalenassem evtiedidh, jis tjïelten jïh byögkeles reereme edtjieh maehtedh sijjen åeliedimmieh tjïrrehtidh gelliej laaki mietie.
Faagemaahtoem dåårrehtidh gaajhki siebriedahkesuerkiej sisnjeli lea stoerre haesteme, jïh barkoem kreava ovmessie njieptjine. Jeatjah råajvarimmieh juktie saemien studeenth jallh studeenth saemien jollebe ööhpehtimmide jïh dotkemasse dåårrehtidh leah saemien studeentekvotah profesjovnestudijinie, ovmessie stipendh jïh studijelaajkoem giehpiedidh.
Saemiedigkie vuajna daerpies ellies dåårrehtimmiestrategijem darjodh mah leah gaajhki siebriedahkesuerkiej bïjre, jïh daate barkoe lea aalkeme.