Hás don leat muhtomin jurddašan, go bártidat, manne ii oktage leat gávdnan buoret čovdosa dása? Dahje go ledjet murjeme dahje eará doaimmaid siste, fáhkka fuobmán idea ja jurddašan diet livččii buorre čoavddus.
Movt galgat mii dáid ideaid ja jurdagiid duohtandahkat?
Sámis mii leat álohii leamašan hutkái. Garra dálkkádat lea dahkan ahte mii leat ferten leat innovatiiva. Olgguldas hástalusat leat bággen min leat hutkái.
Min hutkáivuohta lea čadnon min árbevirolaš máhttui. Go dat deaivvada otná áiggi innovašuvnnain ja fitnodatovdáneamen, dat addá buriid bohtosiid.
Lea stuora illu munnje sámediggeráđi bealis buktit dearvvuođaid ja čuovvut Sápmi Business konferansa dinguin.
Sámis mis leat hui čeahpes gründarat, fitnodagat ja ásahusat. Ja lea somá oaidnit ja vásihit go dii lihkostuvvabehtet. Go Sámediggi doarjjui vuosttaš Sápmi Business Arena lágidemiid leige dainna áigumušain ahte lágiduvvo oktasaš arena gos sámi finodagat, gründarat ja servodatberošteaddjit gávnnadit. Ja danne lei maid dehálaš doarjut lágidemiid dán jagi.
Olu giitu Ovddos, go lehpet čohkken min ja buot buori barggu ovddas maid dahkabehtet.
Munnje lea álo nu movttiidahtti ja inspirašuvdnan go Sámis ásahuvvojit fitnodagat mat váldet vuođu min árbevirolaš máhtus ja kultuvrras, ja geavahit dan reaidun sihke ovddidit min servodaga ja čoavdit otná áiggi hástalusaid.
Ikte serven Sámi allaskuvlla rahpandoaluide. Mu sávaldat lea ahte mis maid leat sámi innovašuvdna ja fitnodatovdánan-oahppofálaldagat boahtteáiggis.
Ealáhusovdánahttin lea servodathuksen. Danne Sámediggái lea dehálaš vuoruhit sámi fitnodatálggahemiid, hutkás- ja lotnolasealáhusaid, sámi kulturásahusaid ja institušuvnnaid. Dát ii leat dušše árvoháhkan. Dat lea dehálaš bargosajit, addá ealli gilliid, nanne sámi gielaid ja kultuvrra.
Ja nanu sámi ealáhusat ja sámi servodagat lea maid gearggusvuohta. Dat nanusmahttá min deaivvademiin ođđa áiggi hástalusaiguin. Ja danne lea ge maid dehálaš ahte mii sámit ieža defineret mii lea dehálaš ovdáneapmi Sámis.
Okta guovddáš fáddá dáid beivviid lea teknologiijaovdáneapmi. Mii oaidnit man jođánit teknologiija ovdána. Goanstajierbmi jo váikkuha min árgabeaivvi, bargoeallima ja hábme servodaga.
Teknologalaš ovdáneapmi addá olu vejolašvuođaid, seammás go hástala min. Sámis mii fertet váldit oasi dán ovdáneamis ja ávkkástallat dain vejolašvuođain maid dat addá. Seammás fertet fuolahit ahte ovdáneapmi lea min eavttuid vuođul - vai min dárbbut, máhttu ja perspektiiva - lea guovddážis. Ja mii fertet maid gozihit ahte dát ovdáneapmi ii goarit máilmmi. Teknologiijaovdáneapmi galgá nannet servodaga, ii fal goaridit dan.
Mun sávan dát beaivvit buktet ođđa jurdagiid. Movttiidahttá din ain joatkit - inspireret, hástalit ja ovdánit. Mun sávan dii čatnatbehtet ođđa oktavuođaid ja ovttasbargguid.
Sámediggeráđi bealis háliidit guldalit ja geavahit dán inspirašuvdnan ain viidáset ovddidit sámi ealáhusovdáneami. Ja midjide lea dehálaš gullat mat leat din dárbbut ja vuordámušat. Ja movt mii ovttas sáhttit bargat láhčit dili vai sámi ealáhusovdáneapmi lihkostuvvá, ja vai dat lea mielde nanneme min servodaga, min gielaid ja min kultuvrra.
Lihku konferánssain!