Håalome Geelkeme Gulliegïeleste – Noerhtelaanti saemien gïelebaalhka

Håalome Geelkeme Gulliegïeleste – Noerhtelaanti saemien gïelebaalhka Jonar Thomassense politihkeles ræriestæjja Maja Kristine Jåman baaktoe.

Munnjien lea stoerre earoe dam byjjes geelkemem Gulliegïeleste – Noerhtelaanti saemien gïelebaalhka - tjïrrehtidh. 

Ij leah dan gellien aejkien daan jaepien manne leam maahteme jiehtedh mij akt hijven orreme daejnie veartenevijries pandemijine, men vïenhtem daate lea akte hijven aejkie. Jïh hævvi lea COVID-19 tsiehkien gaavhtan mijjieh baalhkam daesnie Raarvihkesne geelkebe, mij aaj lea aelhkebe hammojne goh sïejhme lea.

Jïh raaktan aaj eevre reaktoe domtoe, mijjieh libie daesnie baalhkavitnijen hïejmesijjesne, jïh daesnie mijjen dajvesne gusnie baalhkavitnije lea eadtjohkelaakan barkeme åarjelsaemien gïelen jïh kultuvren åvteste.

Dah mah daan jaepien Gulliegïelebaalhkam åadtjoeh leah jïjtjene Jonar Thomasson jïh aaj Ellen Pautamo soemen bieleste.

Gulliegïele lea abpesaemien baalhka jïh vadtasåvva fïerhten mubpien jaepien. Gaajhkesh mah gïeline barkeminie nuepiem utnieh baalhkam åadtjodh, jïh dovne aktegs almetjh, dåehkieh, årganisasjovnh jallh institusjovnh mah vyörtegs barkoem saemien gïelen åvteste dorjeme, maehtieh baalhkam åadtjodh. Baalhka vadtasåvva fïerhten mubpien jaepien akten vitnijasse Soemesne, Sveerjesne, Russlaantesne jïh/jallh Nöörjesne. 16 jaepieh mænngan daam baalhkam voestes aejkien geelki, baalhka Raarvihkese båateme.

Vuarjasjimmiemoenehtse daam Jonaren bïjre tjaala sov buerkiestimmesne:

Dan gaavhtan saemien maadtoe, saemien kultuvre, histovrije jïh gïele leah altese stoerre eadtjohkevoete/ïedtje orreme, dïhte eevre noerebaelien raejeste båarasåbpoe saemiejgujmie soptsestamme jïh dejtie gihtjedamme.

Minngemes tïjjen saemien universiteetesne lohkeme juktie lohkeme- jïh tjaelememaahtoem åadtjodh.

Sov ïedtji gaavhtan, lissine sov barkose, Jonar iktemearan barkeme saemien gïelem vaarjelidh jïh eevtjedh.

Jonar lea gïelegaaltije maam jeenjesh gihtjieh jïh nuhtjieh. Dïhte boerehkelaakan sov saemien gïeledaajroste juaka jïh sov daajroste saemien kultuvren jïh histovrijen bïjre. Gaajhke daan gaavhtan vuarjasjimmiemoenehtse meala Jonar Thomasson lea vyörtegs Gulliegïelebaalhkam åadtjodh.

Mijjieh gujht jeenjesh mah sijhtieh datnem gijhtedh dan vihkeles barkoen åvteste maam leah dorjeme. Manne vïenhtem åarjelsaemien seabradahke datnem joekoen gæjhta dan barkoen åvteste mij mijjen ektie vaajmoegïelem nænnoesåbpoe dorjeme.

Jïjtje leam stoerre aavoem åtneme ovmessie tjaalegh lohkedh maam leah tjaaleme, jïh tuhtjim joekoen luste smaaregïelen baakoeh lohkedh gærjesne «Mojhtsijstie». Manne feejjen mijjieh dagkerh utnebe goh datne mij dov daajroeh mijjine juaka, juktie dam daarpesjibie.

Tjoerem aaj nuepiem nuhtjedh Gïeleaerniem gijhtedh dan joekoen åajvoeh viehkien åvteste daam öörnedimmiem buektiehtidh.

Jïh daejnie datnem Jonar Thomasson birrem bæjjese båetedh tjeahpoediplomem dåastodh.

 

Jïjnjh gæjhtoeh!

Juekemebåalah