Gieries gaajhkesh dovnesh, buerie båeteme!
Stoerre aavojne jïh garmeresvoetine manne daesnie tjåadtjoem daan biejjien jïh åadtjoem Raasten Rastam rïhpestidh.
Daesnie, åarjelsaemien dajven vaajmosne, tjåanghkenibie åarjelsaemien kultuvrem heevehtidh, nænnoestidh jïh vååjndaehtedh - kultuvre mij lea jielije, jïh evtiesovveme boelveste boelvij, jalhts vuastalimmieh jïh ovlæhkoeh orreme.
Raasten Rastah - mij mïerkesje " raasten bijjelen " - lea raaktan nïmhtie: Festivaale mij raasten rastah jåhta. Desnie almetjh gaavnedieh nöörjen jïh sveerjen bieleste Saepmesne, jïh lea gaavnedimmiesijjie gusnie gïele, musihke, beapmoeh jïh soptsestalleme åadtjoe jieledh, jïh juekesovvet. Daesnie maanah, noerh, geerve almetjh jïh båarasåbpoe almetjh gaavnesjieh. - Daesnie saemieh, jïh voelph gaavnesjieh - jïh daesnie pruvvieh bïgkesuvvieh åvtetïjjen, daaletje tïjjen jïh båetijen tïjjen.
Festivaalen åssjaldahke reakasovvi gosse Storstuggu Røørosesne rïhpesovvi jaepien 2000, jïh lea dan mænngan sjïdteme vïhkeles åarjelsaemien kultuvrese. Daate festivaale lea arena lïeremassese, kreative, jïh politihkeles vuerkiehtimman buerie orreme. Sijjie gusnie mijjieh libbie nannoes saemien kultuvrem åasestamma. Vadteme lea joejkemassese , teaterasse, filmese, seminaaride jïh soptsestimmide nuepiem. - jïh diejvedimmie sijjie ålmetjidie.
Daan jaepien Raasten Rastan joekoen hijven jïh gellielaaketje programmem faala, mij gamte feerhmie jïh gaajhkesidie mam akth åtna. Daesnie maanide jïh noeride gååvnese faalaldahke, tjeahpoe mïj gaajesje, faagen soptsestalleme mij haasta, jïh kultuvrelle dååjresh mah skreejrieh. Provgramme vuesehte gaajhke mij lea ræjhkoes jïh gellielaaketje åarjelsaemien siebredahkesne.
Raasten Rastah lea sijjie gusnie maanah jïh noerh åadtjoeh jïjtse kultuvrem vaesistidh. Daate kanne festivaalen vihkielommes darjome. Juktie gosse kultuvre, gïele jïh ektievoete gaavnesjieh, dellie identiteete evtiesåvva jïh nænnoesåbpoe sjædta. Gosse maanah åadtjoeh joejkedh, vytnesjidh, soptsesh goltelidh jïh meatan årrodh soptsestidh gïeh jïh gubpede båetieh - dellie båetijen Saepmie bigkiesovva.
Sïjhtem gaajhkesidie gijhtedh mah festivaaline barkeme - öörnedæjjah, jïjtjevyljehke barkijh, tjiehpiedæjjah, håalijh jïh gaajhkesh mah viehkiehtamma Raasten Rastam sjidtedh akten jielije jïh feerhmeles sijjine. Sïjhtem aaj gaajhkesidie garmerdidh mah diekie båateme - dijjieh mah viehkiehtamme, goltelamme, lohkehtamme jïh jåakeme. Ektesne tjiehtjelem stealladibie gusnie garmeresvoete, nænnoesvoete jïh ektievoete åadtjoe jïeledh.
Goh saemiedigkieraerie manne tuhtjem vihkeles åarjelsaemien kultuvrem tjïertestidh dennie saemien ektievoetesne. Åarjelsaemien gïele edtja govlodh , åarjelsaemien gïele edtja nuhtjsovvedh jïh åarjelsaemien histovrije edtja soptsesovvedh - jïjtse premissesne.
Raasten Rastah lea vihtiestimmie ahte nååhtede. Faamoe gååvnese ektievoetesne. Mavvegevoete gåvnese kultuvresne . Jïh håhkoe gååvnese gosse almetjh gaavnedieh. Nuhtjh daejtie biejjide heevehtidh, lïeredh jïh sinsetnem lutnjedh. Raasten Rastah lea sijjie gusnie mijjieh åarpies.
Gæjhtoe mov åvteste