2021 raejeste 2023 raajan Saemiedigkien veeljemelåhkoe lea læssanamme 2943 almetjigujmie, jïh veeljemelåhkosne ruffien 30.b. 2023, 23 488 almetjh.

– Manne madtjeles veeljemelåhkoe læssene. Daate vuesehte almetjh ïedtjem utnieh jïh sæjhta meatan årrodh saemiedigkieveeljemisnie, stoerretjåanghkoen åvtehke Tom Sottinen (Bk/Ap) jeahta.

39 tjirkijh veeljesuvvieh Saemiedægkan. Jïh edtja gaajhkh Saemiedigkien 39 mandaath veeljemegievlide joekedidh. Man gellie mah leah almetjelåhkosne tjaalasovveme veeljemegievlesne ruffien 30.b. 2023 mandaatejoekedimmiem minngebe saemiedigkieveeljemisnie 2025 muana.

Ávjovárri veeljemegievlie tjïjhtje mandaath åtna veeljemeboelhken 2021-2025, men aktem mandaatem Åarjel-Nöörjen veeljemegeavlan dassa mubpien veeljemeboelhken, mij daan veeljemeboelhken govhte mandaath åtna. Ávjovárri veeljemegievlesne tjïelth Karasjohka, Guovdageaidnu jïh Porsanger. Ruffien 30.b. 2023 3904 almetjh lin tjaalasovveme gievlien veeljemelåhkosne, mij akte lissiehtasse 125 almetjigujmie 2021 mænngan.

Veeljemeboelhken 2025-2029 Àvjovárri veeljemegievlien leah govhte mandaath jïh Åarjel-Nöörjen veeljemegievlien leah tjïjhtje mandaath.

Ruffien 30.b. 2023 Åarjel-Nöörjen veeljemegievlie lea dïhte stööremes veeljemegievlie 5268 almetjigujmie veeljemelåhkosne. Veeljemelåhkoe Åarjel-Nöörjesne lea læssanamme 991 almetjigujmie 2021 mænngan.

Åarjel-Nöörjen veeljemegievlie lea såemies tjïelth fylhkine Møre jïh Romsdal jïh Innlandet, jïh fylhkh Vestland, Rogaland, Agder, Vestfold jïh Telemark, Viken jïh Oslo.