Daaroedehteme lea saemien dajvh dijpeme ovmessie vuekine. Dannasinie jåarhken daarpoeh leah ovmessie. Ræhpas åålmegetjåanghkojste jïh tjaaleldh govlehtimmijste Saemiedigkie sæjhta vuesiehtidh magkerh saemien nuepie, öörnegh jïh råajvarimmieh fïerhte veeljemedajve daarpesje. Govlehtimmieh edtjieh våaromem vierhtiedæmman darjodh mejtie dah ovmessie saemien veeljemedajvh nænnebe jallh jeatjah barkojde daarpesjieh, viehkine saemien gïelide jïh saemien kultuvrem jealajehtedh, vaarjelidh jallh nænnoestidh.
– Dah gïeh bööremes daejrieh mij lïhkesseabradahkesne heannede leah saemieh mah desnie årroeminie. Dannasinie mijjieh sïjhtebe dijjen mïelh utnedh mij Saemiedigkie maahta darjodh. Noerhtedajven veeljemedajvesne mijjieh åadtjoejimh govledh lea stoere daarpoe voenges tjåanghkoesijjieh utnedh. Daan tjaktjen Saemiedigkie sæjhta Åarjelsaemien veeljemedajveste govledh magkerh daarpoeh dej leah, Saemiedigkieraerie Runar Myrnes Balto (NSR)
Jaepien 2024 Saemiedigkie Saemiedigkien råallam vierhtiedi guktie kommisjovnereektehtsem voenges jïh regionaale daltesisnie (aamhtese 037/24). Daejnie ektine mijjieh goerehtimh magkerh saemien nuepieh mah veeljemedajvine gååvnesieh, bïevnesijstie Saemiedigkie åtna saemien dåarjoeöörnegi, maanajgïerti jïh ööhpehtimmiefaaleldahki bïjre. Mijjieh daam goerehtallemem nuhtjebe gosse regionaale govlehtimmide soejkesjibie.
– Govlehtimmieprosesse sjædta gaajhkide veeljemedajvine, mij jåarhka Åarjelsaemien veeljemedajvine rahkan. Manne gaajhkide haastam mïelh seedtedh gosse govlehtimmie dov veeljemedajvese båata, Saemiedigkieraerie jåarhka.
Boelhken golme jaepide Saemiedigkie sæjhta govlehtimmieh öörnedh gaajhkide veeljjemedajvine. Fïerhte govlehtimmie jïjtse aamhtesem åådtje Saemiedigkien pleenumisnie.
Gïehtjh gåessie Saemiedigkie dov veeljemedajvese båata
Gïjren 2025: Noerhtedajven veeljemedajve (dorjesovveme)
Tjaktjen 2025: Åarjelsaemien veeljemedajve
Gïjren 2026: Luvliedajven veeljemedajve
Tjaktjen 2026: Jilliemearoen valgkrets
Tjaktjen 2026: Åarjel-Nöörjen veeljemedajve
Gïjren 2027: Gáisi veeljemedajve
Tjaktjen 2027: Ávjovárri veeljemedajve