Faamoe jarngesne åtna sïelti mïerhkevaaroem jïh ekonomijestuvremem sïeltesne nænnoestidh. Akte vihkeles bielie meatan årrodh Faamosne lea sov viermiem vijriedidh jïh jeatjebh seamma tsiehkesne gaavnedidh.

– Joekoen stoerre aarvoe jeatjah sïelteaajhterh seamma suerkien sisnjelen gaavnesjidh. Jeenjesh oktegh tjahkasjieh berkieh, jïh dellie vihkeles jeatjebh seamma tsiehkesne gaavnedidh. Daejnie gaavnedimmine laavenjostoe tseegkesåvva jïh daajroeevtiedimmie sjugniehtåvva mij joekoen stoerre aarvoem åtna fïereguhten sïeltese, saemiedigkieraerie Silje Karine Muotka (NSR) jeahta.

Árvusne fotograafe Marie Louise Somby Guovdageaidnuste jïh grafihkeles hammoedæjja Karine Kimo Pedersen Deatnuste. Gåabpatjahkh meatan orreme voestes Faamoe-programmesne jïh aarebi sïelteevtiedimmieprogrammine, mejgujmie Saemiedigkie lea nïerhkeme.

Abpe poenge programmine Faamoe 1, mesnie Árvu lij meatan, lea saemien åvtenaestieh tseegkedh.

– Mijjieh saemien sïelth daarpesjibie mah lyhkesieh, jïh mah vuesiehtieh nuepie lea sïeltem tseegkedh mij bïerkene. Saemiedigkien dïedte daejtie åvtese lutnjedh, dan åvteste aavodem dah edtjieh programmem Faamoe 2 juhtedh, Muotka eadtjohkelaakan jeahta.

Joekoen vihkeles mijjieh fokusem utnebe mijjen sïelth nænnoestidh dennie ovseekere tsiehkesne mesnie libie.

– Dan åvteste gegkiestibie daate barkoe sæjhta Árvuse lissie lutnjemem vedtedh jïh dah sijjen dååjrehtimmiejgujmie mejtie ribleme, leah meatan jeatjah saemien sïelth lutnjedh, Muotka minngemosth jeahta.

Saemien kreatijve jielemeaktöörh mah sijhtieh orrijidh bielietïjjen sov sïeltine barkedh jïh buerebh elliestïjjen aelkedh, byöroeh syökedh. Daesnie svaalhtesem ohtsemegoerese gaavnh: https://www.deltager.no/faamoe2#init