«Skuvlen mænngan» lea faalenasse saemienlearoehkidie 1. daltesen raejeste 4. daltesen raajan mij edtja maanaj saemien gïelem, kultuvrem jïh identiteetem nænnoestidh, jååhkesjidh jïh guhkiebasse evtiedidh stååkedimmien, kultuvredarjomi jïh sosijaale lïeremen tjïrrh. 

Mikkel Eskil Mikkelsen Vaino Rensberg, Sámediggi

—Prosjekten åejvieulmie lea åtnoem åarjelsaemien aarkebiejjien gïeleste nænnoestidh jïh lissiehtidh skuvleastoeaejkieöörnegisnie (SAÖ) gïelelierehtimmiemaallen tjïrrh «gïeletjiehpije» ovmessie teemajgujmie jïh darjomigujmie saemiengïelesne, mah learoehkidie 1. daltesen raejeste 4. daltesen raajan sjiehtieh, saemiedigkieraerie Mikkel Eskil Mikkelsen (NSR) jeahta.

Prosjektem evtiedamme jïh tjïrrehtamme skuvlejaepien 2020/2021 jïh 2021/2022, jïh Rossen tjïelte vuajna daerpies prosjektem jåerhkedh jïh guhkiebasse evtiedidh, jïh vihkielommes prosessesne lea nuekie maehteles vierhtiealmetjh saemien gïeline jïh kultuvremaahtojne utnedh.

Dåarjoe aaj maanagïertese

Saemiedigkieraerie aaj 300 000 kråvnah Luvlege maanagïertese dåårjeme prosjektese «Sámástahtte».

Ulmie prosjektine lea jollebe kvaliteetem åadtjodh saemien gïelebarkosne maanagïertesne, vierhtieh edtjieh åtnasovvedh gïelebarkijem seehtedh mij ajve gïelelaavenjassigujmie barka ryöktesth maanajgujmie ektine. Gïelebarkije edtja viehkiehtidh barkoem åarjelsaemien gïelelierehtimmine maanide nænnoestidh eantan vielie goh aarebi.

Gïelebarkoe aaj feerhmie saemien aerpievuekieh maanide buektedh goh joejke jïh vuelie, soptsesh, rijmh jïh reagkah, vætna jïh gåetiebarkoe, jïh darjomh båatsoen sisnjelen.

—Hijven gïeleareenah maanagïertesne leah vihkeles råajvarimmieh gosse maanah edtjieh saemiengïeleldh sjïdtedh, jïh guktie dah nænnoes jïh jearsoes gïeleguedtiejinie sjidtieh, Mikkelsen jeahta.