— Manne staatebudsjedteste guermestem gosse vuajnam reerenasse akten realgiehpiedæmman Saemiedægkan sjïehteladta. Saemiedigkiem mahte ellies baalhka- jïh åasalissiehtassem nyöjhkedh, sæjhta jiehtedh mahte gaajhkh sïejhme saemieh mah saemien gïeline jïh kultuvrine barkeminie, baalhkalissiehtassem nyöjhkedh jaepien 2023. Daate lea sïerredimmie, saemiedigkieraerie Runar Myrnes Balto (NSR) jeahta.
Runar Myrnes Balto
Myrnes Balto dïedtem åtna Saemiedigkien budsjedten åvteste. Saemiedigkien ekonomeles tsiehkie sæjhta krïevije sjïdtedh tïjjen åvtese, joekoen gosse Saemiedigkie 2/3 budsjedteste saemien institusjovnide jïh seabradahkese joekede.
— Jeenjesh eah guarkoeh mahte gaajhke saemien kultuvre- jïh kultuvrebarkoe lea eevre jearohke Saemiedigkien budsjedtese. Akte giehpiedimmie Saemiedigkien budsjedtesne abpe saemien seabradahkem baajnehte, jïh dam barkoem mij dorjesåvva gaajhkem vihth bæjjese bigkedh maam stoerreseabradahke mijjeste veelti daaroedehtemepolitihken tjirrh, Myrnes Balto jeahta.
Akte dejstie suerkijste reerenasse giehpede lea saemien learoevierhtieh, jïh daate giehpiedimmie lea 9 millijovnh kråvnah.
— Reerenassen pryövoe vuesiehtidh ov goh 4 prosenth lissiehtimmiem Saemiedægkan vadta, men daate akte budsjedteteknihkeles rovnegs dahkoe gosse seamma tïjjen 9 millijovnh kråvnah learoevierhtide giehpede. Daate sæjhta jiehtedh saemien maanah eah seamma nuepieh åadtjoeh goh nöörjengïeleldh maanah, jïh daate joekoen laejhtehks tsiehkie produksjovnese digitaale learoevierhtijste.
Myrnes Balto måjhtajahta daate reerenasse lea dååjveme saemien gïelh jïh saemien kultuvrem tjarke lutnjedh.
— Reerenasse sov dååjvehtassem saemide mïedtele, jïh saemieh eah maehtieh madtjele årrodh daejnie. Akte joekoen hijven poenge mij dam vuesehte lea Saemiedigkien budsjedtemierie jaapan 2023 lea 590 millijovnh kråvnah, viertiestamme Nöörjen opera jïh ballettine mij 705 millijovnh kråvnah dååste. Daate byöroe skaamasjadtije årrodh gaajhkesidie, Myrnes Balto minngemes jeahta.