Mikkel Eskil Mikkelsen Árvu, Sámediggi

Maanagïerte saemien faalenassem åtneme gellie jaepieh jïh sæjhta saemien gïeleskreejrehtæjjine jåerhkedh. Maanagïerte vuajna gaajhki barkiji daajroe lea læssanamme jïh gaajhkh maanah skraejriem åadtjoeh saemien kultuvreste soptsesi jïh stååkedimmien tjïrrh abpe jaepiem. Dan gaavhtan sijhtieh saemien gïeleskreejrehtæjjine jåerhkedh guktie maahtoe læssene, kultuvrem jïh gellievoetem gorrede jïh saemien maanah åadtjoeh dam mïsse reaktam utnieh laaki jïh mieriesoejkesjen mietie.

Tjaktjen raejeste maanagïerten leah njieljie åarjelsaemien maanah jïh akte noerhtesaemien. Dej lea akte åarjelsaemien gïeleskreejrehtæjja jïh aaj aktem seehteme gie noerhtesaemien soptseste.

Gïeleskreejrehtæjja lea jïjtse tjïehtjelem maanagïertesne öörnedamme, låavthgåetine, saemien gærjajgujmie jïh stååkegaevniejgujmie. jïh lissine saemien kultuvre edtja våajnoes årrodh gaajhkine goevtesinie abpe jaepiem. Gïeleskreejrehtæjja lissine soejkesjh juaka mejtie goevtesh maehtieh nuhtjedh. Maanagïerte aaj sæjhta prosjektem vijriedidh stååkegaevniejgujmie, appigujmie saemien laavlomigujmie jïh soptsesigujmie jïh gærjajgujmie dovne åarjel- jïh noerhtesaemien gielesne.

Saemiedigkieraerie Mikkel Eskil Mikkelsen (NSR) lea geerjene maehtedh dåarjoem vedtedh gïeleskreejremasse maanagïertesne.

– Sïjhtem seamma tïjjem maanagïertem haestedh jïjtse saemien goevtesem tseegkedh.

Dåarjoe mij lea 159 545 kråvnah vadtasåvva dåarjoeöörnegistie dåarjoe saemien gïelelierehtæmman maanagïertine. Saemiedigkien ulmie dåarjoeöörneginie lea maanagïerth saemien maanide saemiengïelem leerieh.