Tjihkkom Almmudahka lea 111 000 kråvnah dåarjojne åådtjeme jarkoestæmman gærjaraajroste «Diary of a Wimpy Kid» julevsaemien gïelese. Gærjaraajroe lea vietseles gærjaraajroe maanide aaltarisnie 10-15 jaepieh, maam jarkoestamme gellide gïelide voestes bæjhkoehtimmien mænngan englaanten gïelesne 2007.
Gærjaraajroe lea loennen bïjre Greg Hefflye, altese voelpi jïh dej stabnjoeh eejhtegi bïjre. Greg nïekedeminie byögke sjïdtedh. Gærjaraajroe Gregem dåerede maanabaelien raejeste goske puberteete aalka feestadimmine, tjaasmegigujmie, nïejtigujmie jïh stujmine.
– Dej minngemes jaepiej Tjihkkom Almmudahka lea joekoenlaakan gærjah jarkoestamme jïh bæjhkoehtamme julevsaemien gïelesne. Tematihke daennie gærjesne lea joekoen sjyöhtehke maanide don aalteren saaht gusnie veartenisnie leah, guktie åajvoeh mijjieh vielie lidteratuvrem åadtjobe noeride julevsaemien gïelesne, saemiedigkieraerie Maja Kristine Jåma (NSR) jeahta.
Trööndelagen fylhkentjïelte 570 000 kråvnah jarkoestæmman gaektsie fysiske gærjijste, jïh luhkie videjovegærjide åådtje. Trööndelagen fylhkentjïelte, fylhkengærjagåetine goh prosjekten åvtehke, lea gærjah åarjelsaemien gïelese jarkoestamme gellie jaepieh, jïh aaj pijtesaemien jïh upmejesaemien gïelese. Lissine lea videjovegærjah jïh tjoejegærjah dorjeme dej minngemes jaepiej, sjaavnjoej mietie eejhtegijstie jïh mubpijste mah beavneme sijjen daerpiesvoeti bïjre saemien lidteratuvren jïh gïelen sisnjeli.
– Trööndelagen fylhkengærjagåetien barkoe gærjah jarkoestidh maanide jïh noeride åarjelsaemien gïelese lea joekoen vihkele barkoe orreme guktie vielie lidteratuvre åarjelsaemien gïelesne åådtjeme. Gïeleevtiedimmien gaavhtan lea vihkele lidteratuvre gååvnese. Videjovegærjah mejtie lea dorjeme doh minngemes jaepieh leah joekoen vietseles orreme dovne noeri jïh geerve almetji gaskem, gïelelierehtimmien gaavhtan, Jåma jeahta,
Saemiedigkieraerie aaj 34 000 kråvnah dåarjojne vadteme Vinterleik bertemasse jarkoestæmman guvvieraajroste Niillas jïh Magga noerhtesaemien gïelese. Aarebi guvvieraajroem bæjhkoehtamme Niillas jïh Maggan bïjre daaroen, noerhtesaemien, åarjelsaemien jïh kveenen gïelesne. Guvvieraajroe vietseles orreme maanaj gaskem, jïh doekemebarkoe hijven orreme. Aaj teatereversjovne båateme dehtie voestes bæjhkoehtimmeste maam fïerhten asken spïelede Kulturelle skuvlevoessesne, jïh dan mænngan jienebh leah gelliej soptsesi mietie gihtjeme.
– Stoerre daerpiesvoete dagkerh bæjhkoehtimmide mejtie lea aelhkie guarkedh jïh guvvieraajroeh maanide jïh noeride, guktie joekoen hijven maehtedh dåarjoem vedtedh dagkaridie hijven prosjektide, Jåma jeahta.
Saemiedigkieraerie lissine 77 440 kråvnah dåarjojne vadta Fremstad Paraplyese jarkoestæmman maanagærjeste «Få vekk den musa» noerhtesaemien gïelese. Gærja aaj e-gærjine båata.
– Joekoen sjollehke gærja, maam edtja jarkoestidh noerhtesaemien gïelese, aaj e-gærjine båata, dan åvteste joekoen vaenie e-gærjah saemiengïelesne, Jåma jeahta.
Dåarjoeh, tjåanghkan 792 440 kråvnah vadtasuvvieh dåarjoeöörnegistie Dåarjoe prosjektedåarjose saemien lidteratuvrese, mij ræhpas ohtsememieriem åtna goeven 1.b. raajan. Dåarjoeöörnegen ulmie lea kvalitatijve lidteratuvre mij saemiengïelesne gååvnese.