Prosjekth mah dåarjoem åådtjeme joejkem jïh saemien musihkem bæjhkoehtidh leah Johan Sara jr, mij 112 000 kråvnah dåarjojne åådtjeme, jïh Mano Music mij 230 000 kråvnine åådtjeme. Lissine Gába AS lea 227 000 kråvnah åådtjeme managementese jïh evtiedæmman dehtie saemien artisteste Hilda Länsman.
Gába AS sæjhta jïjtjemse tseegkedh goh saemien managemente. Stoerre aevhkie musihkeridie managementem utnedh mij impresariobarkoem dorje aktine rååresjimmielïhtsine jïjtje jïh öörnedæjjaj gaskem mah dongkoeh, lissine artisth profesjonelle laavenjostoegujmiem utnieh mejgujmie digkiedieh jïh soejkesjieh. Gába AS sæjhta artistem Hildá Länsmanem guhkiebasse evtiedidh. Dïhte videjoveshowem åtna, mij gohtjesåvva «visuals», sov konsertine, mij vååjnoe goh hijvenlaakan jåhta.
– Daan biejjien vaenie saemien managementh jïh naan gille mejtie nyjsenæjjah juhtieh. Gieltege sjædta Gába AS:em guhkiebasse dåeriedidh jïh dej evtiedimmien saemien artistijste, saemiedigkieraerie Maja Kristine Jåma (NSR) jeahta.
Saemiedigkieraerie aaj dåarjoem göökte bæjhkoehtimmide saemien musihkeste jïh joejkeste vadteme, mah mearoesaemien joejkem våaroeminie utnieh.
Mano Music-prosjekte Duottar ja Vuotna lea laavenjostoe artisti gaskem Manne & Inger Márjá. Ulmie daejnie prosjektine lea orresjugniedihks albumem sjugniedidh stoerre goltelimmiedajvine. Manne & Inger Márjá joejkem joekehtslaakan nuhtjieh, jïh sijhtieh dovne evtiedidh jïh ektiedidh daam sjïere vuekiem albumesne. Daate aerpievuekien joejkealbume sjædta gusnie gïelh vihkielommes sjidtieh, jïh gusnie komposisjovnh jïh öörnemh joejki bïjre sijhtieh dåarjojne sjïdtedh don joe tseegkesovveme joejkese.
Johan Sara jr:en bæjhkoehtimmie Guollemáddu/ Maadtoeguelie lea minngemes bæjhkoehtimmie joejketriologijesne mij mearoesaemien konteekstese bïejesovveme. Doh aarebi bæjhkoehtimmieh daennie konseptesne leah Mearrasápmelaš jïh Mearraspeajal.
– Joejke lea joekoen vihkeles bielie mijjen kultuvreaerpeste, mij dovne vihkele gorredidh jïh jåerhkedh båetije boelvide. Manne joekoen geerjene daah bæjhkoehtimmieh leah mearoesaemien joejkemevuekiej bïjre, Jåma minngemes jeahta.