Reektehtsen regionaale barkoe galka tjïrrehtovvedh gaajhkine tjïjhtjine veeljemegievline eannan 2027 nåhka. Ulmie lea våaromem tseegkedh vuarjasjæmman mejtie jïh guktie dah ovmessie saemien veeljemegievlieh nænnoes jallh jeatjah barkoem åvtese daarpesjieh gåessie saemien gïelh jïh saemien kultuvrem jealajehtedh, gorredidh jallh nænnoestidh. 

Stoerre ïedtje dovne govlehtimmien åvteste jïh åålmehtjåanghkoej åvteste åarjelsaemien veeljemegievlesne orreme. Saemiedigkieraerie Plaassjesne, Tråantesne, Nåavmesjenjaelmesne jïh Måefesne årroeji. Tjåanghkan medtie 180 meatan årrojh åålmehtjåanghkojne jïh Saemiedigkie 27 tjaaleldh vaestiedassh åadtjoeji.

Åålmehtjåanghkojne jïh govlehtimmie-vaestiedassh båatsoem buekteme goh saemiengïelen, kultuvren jïh identiteetem guedtije, jïh jeenebh vuaptastehtieh båatsoen leah geerve mierietsiehkieh jïh lea daerpies dejtie plaane- jïh areaaleprosessine nænnoestidh. Jielemebarkijh jïh lïhkesadtjh dovne areaali, reaktaj jïh jielemekvaliteeten teehpemen åvteste tjomberdieh. 

– Lea vihkeles tjïertestidh daejtie haestiemidie alvasvoetine ååktesåvva, saemiedigkiepresideente Silje Karine Muotka (NSR) jeahta.

Jeenjh govlehtimmie-vaestiedassh åtnoem faamohkåbpoe gïeleööhpehtimmiemodeellijste vaajtelieh maanagïertesne, maadth- jïh jåarhkeskuvlesne, maaje aaj laavenjostosne gïele- jïh dåajmejarngi gujmie.  Haastasåvva orresth, sjugniedihks jïh strategeles ussjedidh.

– Lea tjïelkes tjuara saemienööhpehtimmiem maanajgïertesne jïh maadthskuvlesne nænnoestidh, jïh daan ektiedimmesne nuepiem saemien ööhpehtimmine jollebe daltesisnie jåarhkedh. 

Govlehtimmie-vaestiedassh vuesiehtieh gïelejarngi barkoe lea stoerre aarvoste mejnie gïelekursh jïh gïelearenah öörnedidh. 

– Mijjieh aerviedibie nænnoestimmie daan beajjetjen gïelejarngijste sæjhta gïeleåtnoem læssanidh jïh nuepide vedtedh voenges gïelefaaleldahkh evtiemdidh jïh nænnoestimmie gïelejarngijste daejrehte gïelejarngh vierhtieh utnieh guktie dah maehtieh vyjrehkåbpoe jïh vielie utnijh jaksedh åarjelsaemien veeljemegievlesne, saemiedigkiepresideente jeahta. 

Jeenjebh aaj tjåanghkoesijjieh ohtselieh. Saemien gåetie lea vaajtelihks dovne Tråantesne jïh Måefesne. Dagkeri gåetiej gujmie maahta saemiengïeleldh kursh jïh gïelekafeeh öörnedidh, aaj gïelebarkoem evtiemdidh jïh jealajehtedh.

– Åålmehtjåanghkoej jïh tjaaleldh govlehtimmien tjïrrh saemiedigkieraerie daerpiesvoeth vååjnedehteme saemien faaleldahkide, öörnegidie jïh råajvarimmide biehkine davvomebarkoste daaroedehtemen mænngan åarjelsaemien veeljemegievlesne. Ij daate ållesth, mohte prosessesne eadtjohkevoetem jïh raerieh vuesiehtamme mej gujmie Saemiedægkan vihkeles åvtese barkedh.

Aamhtese gïetedåvva Saemiedigkien stoerretjåanghkoste stoeretjåanghkosne gaskevåhkoen njoktjen 11.b. Byjjenimmie-, hokse- jïh ööhpehtimmiemoenehtse juvnehtimmiem stoerretjåanghkose buakta. Moenehtsetjåanghkoeh aelkieh dæjstan goevten 24.b. jïh orrijieh bearjadahken goevten 27.b. 

Lohkh stoerretjåanghkoeaamhtesem: 009/26 - Regionaale barkoe Saetniesvoete- jïh liktemekommisjovnen reektehtsinie – Daerpiesvoeth saemien faaleldahkh, öörnegh jïh råajvarimmiej åvteste Åarjelsaemien veeljemegievlesne (aamhtesebuerkiestimmie)