Goh bielie dehtie stoerre ektietïjjen tjeahpoevuesiehtimmeste Veneziabiennale 2022, prosjekte tseegkesovvi man nomme lij Sámi Kick-off kurateringsprosjekt. Ulmie lij dåehkiem saemien kultuvrepersovnelesvoetijste tjöönghkedh mej ïedtje kuratovrine barkedh, guktie dah maehtieh syökedh meatan sjïdtedh goh bielie Veneziabiennaleste. Kuratovre soejkesje, dorje, beavna jïh vuesiehtimmieh tjïrrehte, daamtaj museumine jïh gallerijine.
Gaektsie almetjh veeljesovvin meatan årrodh jïh daah gaektsie edtjieh daelie meatan sjïdtedh aktene jåarhkeevtiedimmesne saemien kuratovreprogrammeste. Programme edtja laavenjostoe faagi dåaresth årrodh Saepmien nöörjen, sveerjen jïh soeme bieleste, joekoen institusjovni gaskem Sámi Dáiddaguovddáš (SDG), Saemien jïlleskuvle, University of Lapland, RiddoDuottarMuseat (RDM), Konstfrämjandet Norrbotten, People's Movement for Art Promotion jïh Norrbotten and Curera.
– Saemien kuratovrh leah fååtesamme guhkiem. Saemiedigkieraerien reektestimmie visuelle tjeahpoen bïjre vihteste lea daerpies lissiehtamme daajrojne saemien tjeahpoen bïjre ööhpehtimmesne, jïh akten kuratovreööhpehtæmman, saemiedigkieraerie Maja Kristine Jåma (NSR) jeahta, mij lea joekoen madtjele prosjekte dan nænnoes tsåeptsiem åtna faageles nænnoes institusjovni luvnie laanteraasti rastah, mahte abpe Saepmesne.
Guhkiebasse ulmie lea saemien kuratovreprogrammem evtiedidh jïh aelkedh, mejnie Saemien jïlleskuvle maahta nïerhkedh jallh dïedtem dan åvteste vaeltedh. Edtja faagegærjam tjaeledh goh illedahke daehtie prosjekteste, jïh gegkeste gærja aaj maahta åtnasovvedh mænngan prosjekte lea galhkeme.
Lea dåarjoem 300 000 kråvnine öörnegen bijjelen institusjovneevtiedimmie dåårjeme. Prosjekte jienebi prioriteeremi nualan öörnegasse båata, dej gaskem Faageles laavenjostoeprosjekth institusjovni gaskem. Dïhte aaj prioriteeremen nuelesne Prosjekth mah ulmine utnieh institusjovnem faageles evtiedidh, jïh guhkiebasse aaj prioriteeremen nuelesne Prosjekth mah viehkiehtieh tjeahpoem jïh kultuvrem beagkoehtidh orrelaakan.
Jis gyhtjelassh jallh gihtjehtimmie, gaskesadth saemiedigkieraeriem Maja Kristine Jåma (NSR), mob. +47 472 42 366, maja.kristine.jama@samediggi.no