– Sommerles lea hijven vuekie maanide jih noeride skreejrehtidh lidteratuvrem lohkedh. Dan gaavhtan dïhte aaj saemiengïelesne, dïhte dovne gïelem jïh lohkemelastoem nænnoste saemien maanaj jïh noeri luvnie. Manne gaajhkesidie haastam meatan årrodh lustes jïh namhtah lohkemekampanjesne daan giesien, saemiedigkieraerie Maja Kristine Jåma (NSR) jeahta.

Ruffien 1.b. raejeste mïetsken 31.b. raajan daan jaepien gaajhkesh mah 1. – 7. daltesisnie vaedtsieh maehtieh meatan årrodh kampanjesne Sommerles.no, gusnie gaskem jeatjah baahtsemem åådtje akten soptsesasse maam tjaelije Mari Moen Holsve lea sjïerelaakan kampanjese tjaaleme. Nedtesæjrosne maahta dovne gærjah registreeredh mejtie maanah leah jïjtjh lohkeme, jïh gærjah mejtie leah lohkeme giejnie akt, jallh mejtie goltelamme (lohkeme jïh tjoejegærjah).

Saemiedigkieraerie gaajhkh gærjagåetieh haasta saemien materijellem nuhtjedh kampanjen bïjre soptsestidh.

Vestfold og Telemark fylhkengærjagåetie jïh Snuti AS lea giesielohkemekampanjem evtiedamme. Saemiedigkie lea jarkoestimmiem kampanjeste dåårjeme. Lohkh vielie kampanjen bïjre daesnie: Sommerles