Jaepien 2021 dotkije Torkel Rasmussen, stillemen mietie Saemiedigkeste, salkehtimmiem Skoltesaemien gïeletsiehkie Nöörjesne – Strategijh jïh råajvarimmieh jealajehtiemasse gïeleste darjoeji, mij lea vihkeles maadthbïevnesh jïh bijjieguvviem Saemiedægkan vadteme dan barkoen bijjelen mij lea skoltesaemien gïelese dorjesovveme dovne Nöörjesne, Soemesne jïh Russlaantesne, jïh mah gïelefaalenassh mah gååvnesieh. Salkehtimmesne råajvarimmieh raereste mah edtjieh gïelem jealajehtedh joekoen nöörjen bielesne, men laavenjostosne skoltesaemiejgujmie Soemesne jïh Russlaantesne.
– Salkehtimmie lea Saemiedægkan buerebe våaromem vadteme gïeleråajvarimmiejgujmie skoltesaemien gïelese nïerhkedh, jïh bijjieguvviem dej nuepiej bijjeli vadteme gosse edtja barkedh skoltesaemien gïelem jealajehtedh Saepmien nöörjen bielesne, Mikkelsen jeahta.
Salkehtimmie vuesehte ånnetji vielie goh 300 almetjh mah skoltesaemien gïelem soptsestieh jïh ovrehte 10 almetjh mah skoltesaemien soptsestieh nöörjen bielesne. Naan gille sijjen maanide skoltesaemien lïerehtieh. Salkehtimmie tjïerteste dïhte vihkielommes maam Saemiedigkie maahta darjodh lea sjïehteladtedh naemhtie guktie skoltesaemien årrojh nöörjen bielesne maehtieh identiteetem, kultuvrem jïh destie aaj skoltesaemien gïelem jealajehtedh jïjtselaakan.
Saemiedigkie almetjetjåanghkoem åtneme skoltesaemien gïeletsiehkien bïjre, jïh daate vuesiehti almetjh dejnie skoltesaemien byjresinie Saepmien nöörjen bielesne, ïedtjem utnieh skoltesaemien gïelem vaarjelidh jïh bååstede vaeltedh.
Saemiedigkieraerien juvnehtimmie stoerretjåanghkose lea Saemiedigkie skoltesaemien gïelem jååhkesje goh saemien gïele Nöörjesne. Saemiedigkie sæjhta viehkine årrodh sjïehteladtedh eadtjohke skoltesaemien gïelebyjresem Saepmien nöörjen bielesne sjugniedidh, Saemiedigkie sæjhta jïjtse prioriteeremh budsjedtesne darjodh mah edtjieh skoltesaemien gïelem nænnoestidh jïh jealajehtedh, laavenjostojne nïerhkedh rïjhkeraasten rastah skoltesaemien gïelem nöörjen bielesne jealajehtedh jïh barkedh ihke jienebh skoltesaemien sijjienommh registreereme sjidtieh Sentralt sijjienommeregisterisnie guktie dah maehtieh byögkeleslaakan åtnasovvedh, vuesiehtimmien gaavhtan tsiegline jïh kaarhtine. Sæjhta råajvarimmieh bæjjese fulkedh fïerhtenjaapetje budsjedtine.
Aamhtese 39/22 Geajnoeveeljeme skoltesaemien gïelejealajehtiemasse – guhkiebasse barkoe reektehtsistie skoltesaemien gïeletsiehkien bïjre Nöörjesne, gïetesåvva stoerretjåanghkosne duarstan, golken 13.b.
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no
Aamhtesetjaatsegh