Håalome KulturSápmi Jielleváresne

Håalome KulturSápmi Jielleváresne

Saemiedigkieraerie Maja Kristine Jåma (NSR) håalome KulturSápmi Jielleváresne

Buerie biejjie!

Daej biejjiej mijjieh daesnie tjåanghkenamme juktie gaavnesjidh, digkiedidh jïh sinsitneste lïeredh. Mejtie aaj orre åssjalommesh bæjjese båetieh jïh mejtie buektiehtibie åvtese vuejnedh.

Saemien tjeahpoe jïh kultuvre jïjnje tjååtskelesvoetem åådtjeme minngemes tïjjem. Manne garmeres jïh aavosne dïsse. Manne jïjtje vuejneme man stoerre daerpiesvoete mijjien jïjtjemh kultuvrem dååjrehtidh, jïh saemiej ektievoetem jïh nænnoesvoetem damtedh. Stoerre tjeahpoearenaasne goh Venezia biennale, nasjovnalearenaasne, aalkoealmetji dorjemh ålkoelaantesne, men aaj Saepmesne. Daesnie mijjen jïjtjemh tjåanghkoesijjine jïh festivaaline. Wow, man væjkeles mijjen tjiehpiedæjjah!

Saemieh jielieh rïjhkeraasti namhtah. Mijjen gïelh, kultuvre, vætnoe, dajvh jïh fuelhkieh eah raastide vuejnieh jallh demtieh. Læjhkan mijjieh goh åålmege rïjhkeraastide damta fïerhten biejjien. Minngemes jaepieh koronasuetien gaavhtan, daelie vesties dåaroen gaavhtan. Mijjen vïelli jïh åabpaj bïjre russien bealesne ussjedibie jïh vaajtelibie varke orreje.

Daejrebe haestemh kultuvresuerkesne guktie evtiedimmiem gorredidh rïjhkeraasti rastah. Jåerhkebe barkedh saemien-noerhten laavenjosteminie ihke rïjhkerastide våålese bigkedh jïh saemien tjeahpoe- jïh kultuvresuerkiem ektesne nænnoestidh. Daerpies barkoem dåarjodh dovne ekonomeles jïh politihkeles.

Gaajhkesh mah kultuvrine berkieh dam darjoeh stoerre ïedtjine jïh buektiehtieh jïjnjem darjodh. Men, dej daerpiesvoete evtiedidh. Dan åvteste seammasïenten vihkeles institusjovnide jïh organisasjovnide nænnoestidh.

Akte mubpie bielie dennie barkoste lea juste kultuvreaktööride tjöönghkedh jïh sijjiem öörnedh gusnie maehtebe dagkerh aamhtesidie vååjnesasse bïejedh jïh digkiedidh guktie åvtese juhtedh.

Manne aavosne Saemiedigkie daam tjåanghkoesijjiem dåårjeme jïh Saemieraeriem aaj mij daam konferaansem öörneme.

Manne aavodem daesnie årrodh, dååjrehtimmieh juekedh, soptsestidh, gaavnesjidh jïh vielie kultuvresuerkeste lïeredh. Daate vihkeles munnjan gie kultuvredïedtem åtna saemiedigkieraeresne nöörjen bealesne Saepmesne.

Håhkesjem tryjjes jïh gieltegs biejjieh sjidtieh!

Gæjhtoe.