– Jarle Jonassen guhkiem dååjrehtimmiem åtna jïh dan lea nænnoes ektiedimmie Saemien Sijtese. Mijjieh aavone dïhte jååhkesjamme åejvine orre boelhkesne årrodh, saemiedigkieraerie Ole-Henrik Bjørkmo Lifjell (NSR) jeahta.

Ole-Henrik Bjørkmo Lifjell Ørjan Marakatt Bertelsen

Fïerhten jaepien Saemiedigkie göökte ståvroelïhtsegh vaaralïhtsegigujmie Saemien Sijtese muana. Saemiedigkie aaj maahta ståvroeåejviem moenedh. Funksjovnetïjje lea njieljie jaepieh.

Saemiedigkieraerie aaj lea Fransisca Herbst Kappfjell moeneme ståvroelïhtseginie sjïdtedh, jïh Vanja Tørresdal lea vaaralïhtsege. Daniel Steinfjell lea Jarle Jonassenen vaaralïhtsege.

Saemien Sijten ståvrosne leah vïjhte lïhtsegh. Kultuvre- jïh museumesiebrie Saemien Sijte jïh barkijh museumisnie dejtie jeatjabidie lïhtsegidie veeljieh.

-Saemien sijten lea sjïere dåemiedimmie Saepmesne goh dïhte aajnehke åarjelsaemien museume nöörjen bealesne. Dej minngemes jaepiej bijjeli Saemien sijte sjïdtedi jïh Åarjel-saepmiem buerielaakan evtiedi, Dïhte orre gærja åarjelsaemien histovrijen bïjre lea akte dejstie urremes gieltegs prosjektijste, mij aadtjegh redaktööredåehkiem åadtjoeji. Saemiedigkie aavode buerie ektiebarkoem Saemien sijtine jïh orre ståvrojne utnedh. Bjørkmo Lifjell jeahta.

Jarle Jonassen gellebe vervh ståvrosne aarebi åtneme. Dïhte lij ståvroeåejvine minngemes boelhkesne, jïh aaj boelhkesne 2004-2005. Dïhte aaj lij mubpieåejvine jaepiej 2018-2021.