Jaepien 2021 professovre Jon Todal Nöörjen Saemiedigkien bieleste, goerehtimmieh pijtesaemien jïh upmejesaemien gïelijste tjïrrehti, jïh lea salkehtimmieh tjaaleme tsiehkien bïjre daelie jïh råajvarimmiej bïjre båetijen aajkan daejtie gïelide. Salkehtimmine dïhte tjïerteste laavenjostoe dej pijtesaemien jïh upmejesaemien byjresigujmie sveerjen bielesne lea daerpies.
Mikkel Eskil Mikkelsen
Åse M. P. Pulk, Sámediggi
– Salkehtimmieh leah Saemiedægkan våaromem vadteme vuartasjidh mejtie gåarede daejtie gïelide jealajehtedh. Dah aaj bijjieguvviem vadteme såemies vuekiejgujmie mejtie maahta jealajehtemebarkosne nuhtjedh nöörjen bielesne, Mikkelsen jeahta.
Salkehtimmieh vuesiehtieh tsiehkie daejtie gïelide nöörjen bielesne lea naa seammalaakan. Salkehtimmieh tjierteste garre daaroedehtemepolitihken gaavhtan daejnie dajvine ij leah gïeleutnijh nöörjen bielesne mah leah pijtesaemien jallh upmejesaemien hïejmegïeline åtneme maanabaelien. Læjhkan almetjh mah maadtoeladtji jïh kulturelle ektiedimmien tjïrrh jïjtjemse dovne pijtesaemien jïh upmejesaemien gïeligujmie jïh kultuvrigujmie identifiseerieh. Gïelh annje sveerjen bielesne åtnasuvvieh jïh almetjh gååvnesieh mah pijtesaemien jïh upmejesaemien joekehts daltesinie haalvoeh. Gïeli statuse lea læjhkan vaahresne jïh gåabpegh gïelh vuajnalgieh goh itjmies vaahresne nåhkedh.
Saemiedigkie almetjetjåanghkoeh åtneme pijtesaemien jïh upmejesaemien gïeledajvine, edtja tsåatskelesvoetem jïh bïevnesh åadtjodh gïeli tsiehkien bïjre, jïh seamma tïjjen bïevnesh åadtjodh mah daerpiesvoeth jïh dåajvoeh gïelebyjresh dovne nöörjen jïh sveerjen bielesne jealajehtemebarkose utnieh. Dellie gïelebyjresh soptsestin dej lea ïedtje gïelide bååstede vaeltedh jïh dejtie vaarjelidh.
Saemiedigkieraerie veeljie ektie stoerretjåanghkoeaamhtesem buektedh jealajehtemen bïjre pijtesaemien jïh upmejesaemien gïelijste Nöörjesne. Mijjieh göökte raeriestimmieh buektebe guktie jïjtje nænnoestimmie pijtesaemien gïelese sjædta jïh jïjtse upmejesaemien gïelese. Saemiedigkieraerie raereste Saemiedigkie pijtesaemien jïh upmejesaemien jååhkesje goh saemien gïelh Nöörjesne.
– Sïjhtebe viehkine årrodh guktie maahta sjïehteladtedh eadtjohke pijtesaemien jïh upmejesaemien gïelebyjresh sjugniedidh nöörjen bielesne, jïh laavenjostoen åvteste barkedh laanteraasten rastah, Mikkelsen jeahta. Saemiedigkieraerie raereste dan åvteste jïjtse prioriteeremh budsjedtesne darjodh jealajehtiemasse jïh nænnoestæmman gïelijste.
Saemiedigkieraerie aaj raereste daah göökte gïelh sijjienommelaaken (Lov om stadnamn) mieriedimmien sïjse åadtjodh guktie maahta jienebh pijtesaemien jïh upmejesaemien sijjienommh Sentralt stedsnavnregisteren sïjse registreeredh, jïh byögkeles ektiedimmine åtnasovvedh.
Stoerretjåanghkoe aamhtesem gïetede gaskevåhkoen, njoktjen 8. b.
Lohkh aamhtesetjaatsegh: Aamhtese 08/23 Jealajehteme pijtesaemien jïh upmejesaemien gïelijste Nöörjesne
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no