Ruffien 1. b. daan jaapetje Sommerles.no-kampanje aalka, jïh kampanje vaasa mïetsken 31.b. raajan. Sommerles.no lea stoerre lahkoe orreme gellie jaepieh, jïh dæjman bijjelen 164 000 maanah lin meatan. Kampanjen ulmie lea maanide skreejrehtidh dan jïjnjem lohkedh maam ajve åajsoeh aktene guhkies giesie-eejehtallemisnie.

Daan jaepien gærjagåetieh bïjre jarkan laantesne aaj nuepiem utnieh saemien maanalidteratuvrem mïerhkesjidh jïh våajnoes darjodh skuvlemaanide lohkemekampanjen sjïekenisnie.

– Manne geerjene mijjieh maehtebe viehkine årrodh guktie saemien learohkh mah meatan kampanjesne åadtjoeh lidteratuvrem jïjtsh gïelesne lohkedh,  jïh saemien maanalidteratuvre vielie våajnoes dorjesåvva gaajhkide learoehkidie mah leah meatan, saemiedigkieraerie Maja Kristine Jåma (NSR) jeahta.

Julevsaemien dajvesne Hábmerisnie rïhpestimmiefeeste sjædta Sommerles 2022-kampanjese tjïelten gaajhkide learoehkidie 1.-7. klaassesne ruffien 1.b. Sommerles-tjaelije Mari Moen Holsve rïhpestimmiefeestese båata Hamsunjarngese Presteidesne Hábmerisnie. Dellie rïhpestimmie kampanjeste sjædta lohkeminie julevsaemien gïelesne.

Sommerles.no:n gaavhtan luste sjædta lohkedh!

• Sommerles.no lea digitaale lohkemekampanje nedtesæjrosne Sommerles.no. Maanah profijlem darjoeh, gaajhkem registreerieh maam luhkieh kampanjeboelhken jïh poengh tjöönghkieh fïerhten sæjroen åvteste maam luhkieh.
• Lissine poengidie maanah aaj maehtieh digitaale troféh jïh lustes baalhkah åadtjodh mejtie maehtieh gærjagåetesne veedtjedh.
• Maanah baahtsemem åadtjoeh soptsesasse maam tjaelije Mari Moen Holsve lea sjïerelaakan kampanjese tjaaleme.
• Sommerles.no lea maanide 1. – 7. klaassesne jïh vaasa ruffien 1.b. raejeste mïetsken 31.b. raajan.
• Vestfold jïh Telemark fylhkengærjagåetie jïh Snuti AS leah Sommerles evtiedamme.

Jis gihtjehtimmie, gaskesadth saemiedigkieraeriem Maja Kristine Jåma, +47 472 42 366, maja.kristine.jama@samediggi.no