Nænnoestahke saemiedigkieraerien juvnehtimmien mietie.
Kent Valio barkoem Saemiedigkien direktöörine jaepieboelhkem 01.11.2026 raejeste 31.10.2032 raajan åådtjeme jïh uvtemes barkoesijjie Saemiedigkien reeremisnie Kárášjohkesne.
Saemiedigkiepresideente Silje Karine Muotka madtjeles barkoem vadteme.
Silje Karine Muotka
Árvu/Sámediggi
– Dan lea stinkes åvtehkedååjrehtsh byjjes jïh politihkeles gïehtelimmeste, jïh hijven maahtoem saemien seabradahkeste åtna. Dïhte hijven våarome mestie reeremem juhtiehtidh jolle maahtojne jïh stoerre eadtjohkevoetine mijjen seabradahkestillemen åvteste. Direktööre galka barkedh abpe Saemiedigkien åvteste jïh sjïehteladtedh guktie almetjeveeljemi nænnoestahki gujmie åvtese barkedh, Muotka jeahta.
Tjïjhtje almetjh barkoem ohtsin Saemiedigkien direktöörine gåessie ohtsememierie lij vaaseme mïetsken 3. biejjien 2026. Evtebe direktööre, Inger Marit Eira-Åhrén, barkoem aktem jaepieboelhkem utni skïereden 1. biejjien 2020 raejeste mïetsken 31. biejjien raajan 2026.
Feejjen leajhtadimmien åvteste
Kent Valio
Åse M.P. Pulk/Sámediggi
– Manne feejjen daam barkoem åådtjeme jïh aavodem dejnie vihkeles barkojne viehkiehtidh, barkiji ektine, abpe politihkeles daltesen åvteste Saemiedigkesne. Manne dam barkoem vaaltam plijjiesvoetine Saemiedigkiebarkiji maahtoen åvteste jïh ååktojne dan vihkeles barkoen åvteste maam dah almetjeveeljemh utnieh saemien åålmegen åvteste. Mov voestes laavenjassine dejtie politihkeles dongkemh vuartasjidh jïh barkijijstie goltelidh, Kent Valio jeahta.
Dårrehtimmiebyjrove Heia Nord-Norge Saemiedigkiem viehkiehtamme eensi dåårrehtimmieprosessen tjïrrh. Barkoe kandidaateohtsemem, veeljemem, gellie goerehtallemh, pryövoeh jïh eensi vuesiehtimmievuejnemh feerhmeme. Saemiedigkien åejvietjirkije aaj prosessesne dåeriedamme. Minngemes vierhtiedimmesne raerie vihkelesvoetem bïejeme kandidaaten formelle maahtose, åejviedååjrehtsasse, jïjtjevoetese jïh vuesiehtimmide.
Gellielaaketje våarome
Kent Valio Guovdageaidnuste, jïh aadtjegh seniorraeriestæjjine Sámi Allaskuvlen rektovrese barkeme. Valio journalistine barkeme jïh åejvine NRK:sne gelline jaepine ovmessie barkojne.
Valio lij tjïeltedirektööre Guovdageaidnun tjïeltesne boelhkem 2015-2023. Dïhte stinkes maahtoem saemien gïelen jïh kultuvren bïjre åtna, jïh veele Saepmien politihkeles tsiehkiem daajra.
Saetnies Kent Valion bïjre:
- 54 jaepien båeries, Guovdageaidnuste
- Evtebe tjïeltedirektööre Guovdageaidnusne (2015-2023)
- Maasteregrade njueniehkisnie, Handelshøyskolen BI jïh cand.mag. seabradahkefaagesne, Høgskolen Bodø
- Joekehts åejviebarkoeh NRK:sne
- Noerhtesaemien voestesgïeline
Jeatjah gaskem barkeme jïjtje jielemeburrine, internasjonaale iktedæjjine Internasjonaale Saemien Filmeinstituhtisnie, seniorraeriestæjjine rektovren åvteste Sámi Allaskuvlesne.