Dåarjoeh vadtasuvvieh dåarjoeöörnegen bijjelen dåarjoe prosjektide jïh evtiedimmiebarkose maanagïertine, gusnie öörnegen ulmie lea jolle kvaliteete saemien gïele- jïh kultuvrebarkosne maanagïertine.
Doh 17 joekehts prosjekth leah naemhtie juakasovveme; 8 gïeleevtiedimmieprosjekth, 1 lea evtiedimmie pilovtemaanagïerteste, 6 voenges evtiedimmieprosjekth mah saemien aerpievuekiem tjïertestieh, 2 leah orre saemiengïeleldh maanagïertefaalenassh jïh 6 leah voenges evtiedimmieprosjekth mah joekoen leavloem beaja saemien aerpievuekien barkose.
Bijjieguvvie joekedimmijste prosjektide jïh evtiedimmiebarkose 2022 (PDF, 113 kB)
Åarjelsaemien maanagïerte Suaja maanagïerte Snåasesne 300 000 kråvnah dåarjojne åådtje. Maanagïerte lea meatan Saemiedigkien maanagïerteprosjektesne SáMOS, mij edtja jarkelimmiem saemien maanagïertestruktuvresne sjugniedidh saemien filosofijen jïh aerpievuekien daajroen mietie. Maanagïerte veeljesovveme goh akte ållesth njieljie pilovtemaanagïertijste prosjektesne jïh meatan studijisnie Saemien jïlleskuvlen tjïrrh. Dåarjoe edtja vieliemaaksojde maeksedh mejtie maanagïerte åtna gosse meatan prosjektesne.
Maanagïerte Guovddáš mánáidgárdi Altesne 500 000 kråvnah dåarjojne åådtje jienebh maanagïertesijjieh maanagïertesne tseegkedh, jïh saemien maanagïertefaalenassem Altesne nænnoestidh jïh maanaj saemien gïelem, kultuvrem jïh identiteetem. Mikkelsen lea aavone Alta tjïelte sæjhta jienebh saemien maanagïertesijjieh tseegkedh.
Mikkel Eskil Mikkelsen
Árvu, Sámediggi
– Daelie ahkedh jienebh mah saemien maanagïertesijjiej mietie gihtjieh Altesne, jienebh eejhtegh sijhtieh maanah edtjieh saemien maanagïertefaalenassem åadtjodh. Seamma tïjjen libie vuajneme faalenasse saemien maanagïertesijjijste ij leah tjoemehtimmiem mietie orreme, Mikkelsen jeahta.
Nöörjen maanagïerte Namsskogan maanagïerte Laakesvuemesne 200 000 kråvnah åådtje prosjektese Gïelevierhtieh åarjelsaemien gïelesne jïh pedagogeles materijellem åestedh. Maanagïerte sæjhta sjïehteladtedh guktie maanah edtjieh åadtjodh jïjtsh gïelem govledh jïh lïeredh maanagïerten aarkebiejjien, gusnie aaj maanagïerten barkijh edtjieh aarkebiejjien baakoeh lïeredh mah edtjieh viehkine årrodh maanaj gïelem lissiehtidh.
– Manne joekoen aavone jienebh nöörjen maanagïerth sijjen maanide saemien gïele- jïh kultuvrefaalenassem faalehtieh maanagïerten aarkebiejjien, Mikkelsen jeahta.
Orre ohtsememierie daennie dåarjoeöörnegisnie aalka goevten 2023 aalkoelisnie. Dellie maanagïerth mah saemiengïeleldh faalenassem saemien maanide vedtieh jïh maanagïerth mah sijhtieh faalenassem vedtedh mij saemien gïele- jïh kultuvremaahtoem eevtjieh saemiengïeleldh maanide, maehtieh ohtsedh.
Jis gihtjehtimmie jallh gyhtjelassh, gaskesadth saemiedigkieraeriem Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no