Saemiedigkieraerie aaj dej joekehts vuajnoeh vïhtesjadta mij hijven prosessh lea saemien reakta-aajhterigujmie mah ryöktesth baajnehtamme sjidtieh, jïh daajroevåaromen bïjre konsekvensigujmie saemien båatsose.

– Ij leah aktem frijje jïh åvtelhbodti jååhkesjimmiem åådtjeme Tjåehkeren sïjteste soejkesjen jallh lyjnehke råajvarimmiej bïjre. Vaallah daajroevåarome dej ållesth konsekvensi bïjre båatsose leah jååhkesjamme, saemiedigkieraerie Maja Kristine Jåma (NSR) jeahta.

Saemiedigkien soejkesjebïhkedæjja tjïerteste lea vihkele jïh vyörtegs saemien ïedtjeladtjh leah meatan soejkesjeprosessesne, jïh byöroe aerpievuekien saemien daajrose stoerre leavloem bïejedh åtnoen bïjre dajvijste soejkesjeprosessen tjïrrh.

Saemien organisasjovnh jïh siebrieh leah govlehtimmielahtestimmiej tjïrrh sijjen tjoeperdimmieh buakteme konsekvensi bïjre saemien kultuvren jïh jielemen eatnemevåaroemasse båatsoen tjïrrh. Aamhtesebuerkiestimmesne tjïelte vuesehte barkoesijjieh leah daerpies jis edtja juhtemem tjïelteste giehpiedidh, jïh sæjhta eevre daerpies årrodh årrojelåhkoem lissiehtidh jis gellie jielemeaktöörh edtjieh bïerkenidh.

– Manne vuajnam daerpies måjhtajehtedh saemieh aaj bielie voenges seabradahkeste, jïh saemien barkoesijjieh stoerre seabradahkenuhteligs aarvoem utnieh, jïh leah fåantoeh man åvteste almetjh sijjide juhtieh jïh noerh veeljieh orrijidh jïh jåerhkedh desnie årrodh. Båatsoe lea stoerre jielemeaktööre jïh nænnoes beapmoeprodusente, jïh lea jearohke dajvijste juktie evtiedimmienuepieh gorredidh, Jåma jeahta.

Saemiedigkieraerie aaj meala daate akte åssjaldahkevuekie mij aajkoen vööste strijrie soejkesjinie akten båetijen aejkien jïh nænnoes evtiedimmien bïjle Raarvihkesne.

– Eatnemem jïh gåatomedajvh bovtsese nåhkehtidh ij leah naan hijven vuekie. Manne aaj mïelem doh signaalh mejtie tjïelte daesnie vadta ij årromelastoem jallh jaahkoem båetijen aajkan vedtieh noere båatsoesaemide, Jåma minngemes jeahta.