Saemiedigkiepresideenth, åajvah saemiedigkietjirkijh, gieries guessieh

Bielie-njealjede våhkoej gietjeste dam sårkoen sjuvvesjem dåastoejimh Gånka Harald V lij sealadamme.

Gånka Harald gellien aejkien mijjen guessie Saemiedigkesne orreme. Jaepien 1993 Saemiedigkiem voestes aejkien rïhpesti, jïh dæjmetje golken Saemiedigkiem sov minngemes aejkien rïhpesti. Daan biejjien lea rovnegs ussjedidh dïhte eevre daam håalemesijjesne tjåadtjoeji.

Gånka Harald lij staeries verdde. Gånka saemiej posisjovnem lutnji Nöörjesne jïh Saemiedigkien vihkelesvoetem nænnoesti. Dïhte byjjes Nöörjem vijriemdi jïh saemide jïjtse buartan bööri.

Gellien aejkien mijjen gånka njueniehkinie jeatjabistie. Jeenjh saemieh Gånka Haralden håalemem jaepien 1997 mujhtieh gusnie dïhte staaten daaroedehtemepolitihken gaavhtan gaatelassji. Jaepien 2005 dejtie Divtasvuodnesne gaatelassji gïeh ov-reaktah rïjhkebïehtedæjjine gohtjesovvin dåaroen mænngan juktie baateræjjah viehkiehtin rastam restiedidh. Gånka guarkaji historihken meadtoe deahpadamme jïh veelji jïjtje dam staeriemdidh - davvomen gaavhtan. Dåaktere Ester Fjellheim Gånka Haraldem psykolåågine gohtjeme, juktie dïhte saemien åålmegen vaejviem jïjtse baakoej gujmie dåastoeji.

Idtji Gånka Harald provhkh kråvnine vaedtsedh. Mohte jaepien 1969 dïhte šávkam tseeki, saemien gaarmanæjjaj tjohpe, gåessie såtnoeh Trööhnege Sonjah Guovdageaidnusne guessine mïnnigan, orre-tjipte kråvnaprinsepaarrine. Guvvieh dejstie guaktijste veelkes muadtaj gujmie ikoniske sjïdteme. Saemiej vaarjoej gujmie dah guaktah saemien kultuvrem vååjnedehtigan jïh jååhkesjigan.

Mijjieh åemie Gånka Haraldem gijhtebe, juktie eejnegen mijjem vööjnim, mijjem golteli, joekoen dej aejkiej ov-goh eah gïeh jeatjah dam darjoeji.

Bielie-mubpie våhkoej gietjeste sårkoen sjuvvesje bööti Prinsessa Astrid lij sealadamme, göökte våhkoeh vïelleben mænngan.

Prinsesse Astrid, fru Ferner Ola Vatn, Det kongelige hoff

Prinsessa Astrid Nöörjen voestesnyjsenæjjine dåemiedi gelliej jaepiej, aehtjeben dåarjoe, Gånka Olav V:n bielesne.

Prinsessa Astrid Finnmarkesne guessine mïnni jaepien 1959 Gånka Olaven ektesne. Skiippagurran gåajkoe gånkaraajroe tjoeri tjöödtjestidh, juktie dusnie onne saemien nïejte gaske geajnosne lij tjåadtjoen blommaj gujmie gånkese geelken. Dïhte onne nïejte lij 7 jaepien båeries Inger Helander Länsman. Dagkerh gaavnesjimmieh prinsessam sov guhkies jielemen gånkagåetien dïenesjisnie fulki. Jïh nimhtie dïhte lij bielie gånkagåeteste mij mijjen lïhkebasse bööti, mij mijjen luvnie guessine årroeji jïh mijjen tjirkijh slåahtese bööri.

Prinsessa Astrid nyjsenæjjaj råållam gånkagåetesne jïh nöörjen seabradahkesne vijriemdamme. Dïhte gieriesvoeten åvteste barki jïh jieleme fuelhkine sov jïjtsh premissi mietie. Dïhte krïevi barkoejielemem jïh fuelhkiejielemem iktedidh. Prinsessa jïjtje sosiaalekontovrese veedtsi Majorstuesne Oslovisnie jïh sijjiem maanagïertesne sov baarnan meedti – juktie sov lij jïjtjen barkoe.

Prinsessa hïnni njielje gånkaj åvteste barkedh, jïh Gånkagåetien åvteste barki eevre sov minngiemadtjese. Dïhte lij eadtjohke, hearven jïh ïedtjem dejstie vuesiehti giej gujmie dïhte dïervesji.

Mijjieh Gånka Haralden mojhtesasse raeffiem bæjhkoehtibie.

Mijjieh Prinsessa Astriden mojhtesasse raeffiem bæjhkoehtibie.

Mijjieh sïjhtebe daelie minudtem sjeavohtidh Gånka Harald V jïh Prinsessa Astriden earose.